සජිත් – රනිල් කියන්නේ පරණ යාළුවෝ
මධ්‍යස්ථ දක්ෂිණාංශ බලවේග එක්විය යුතු බවට ජනතාවගේ ඉල්ලීමක් පවතින බව හිටපු පාර්ලිමේන්තු මන්ත්‍රී නවීන් දිසානායක පවසනවා.
ඒ සඳහා නිල මට්ටමේ සාකච්ඡා ආරම්භ වී නොමැති වුවත්, සමගි ජන බලවේගය හා එක්සත් ජාතික පක්ෂය නිල නොවන මට්ටමින් සාකච්ඡා පවත්වන බවයි අද (07) මාධ්‍ය වෙත අදහස් දක්වමින් හිටපු මන්ත්‍රීවරයා සඳහන් කළේ.
ඒ අනුව ඊළඟ පළාත් පාලන මැතිවරණය සඳහා සමගි ජන බලවේගය සහ එක්සත් ජාතික පක්ෂය එක්වී එක ලාංඡනයක් යටතේ තරග කළහොත් ආණ්ඩුවට අභියෝගයක් ලබාදිය හැකි බවද ඔහු සඳහන් කළා.
රනිල් වික්‍රමසිංහ හා සජිත් ප්‍රේමදාස යනු පැරණි මිතුරන් බවත්, යාලුකම් එලෙසින් අමතක වන බවට තමන් නොසිතන බවයි හිටපු පාර්ලිමේන්තු මන්ත්‍රී නවීන් දිසානායක වැඩිදුරටත් ප්‍රකාශ කළේ.