තුර්කියේ පුපුරණ ද්‍රව්‍ය නිෂ්පාදන කම්හලක සිදුවූ පිපිරීමකින් 12ක් මරුට
වයඹදිග තුර්කියේ පතොරම් සහ පුපුරණ ද්‍රව්‍ය නිෂ්පාදන කම්හලක සිදුවූ පිපිරීමකින් පුද්ගලයන් 12 දෙනෙකු ජීවිතක්ෂයට පත්ව තවත් හතර දෙනෙකු තුවාල ලබා ඇති බව වාර්තා වනවා.
විදෙස් මාධ්‍ය වාර්තාවන්ට අනුව, මෙම පිපිරුම සිදුව ඇත්තේ එරට වේලාවෙන් උදෑසන 8:25 ට පමණ බව සඳහන්.
සිද්ධියට හේතුව තවමත් පැහැදිලි නොමැති බවයි එරට අභ්‍යන්තර කටයුතු අමාත්‍ය අලි යෙර්ලිකායා මාධ්‍ය හමුවේ සඳහන් කර ඇත්තේ.
වීඩියෝ පටවල දක්නට ලැබෙන ආකාරයට, කර්මාන්තශාලාවෙන් ගිනි බෝලයක් පුපුරා යන සෙයක් පෙන්නුම් කරන අතර ඉන් ගොඩනැගිල්ලේ කොටසක් විනාශ වී ඇති බවත් දිස් වේ.
ගින්න මැඩපැවැත්වීම සඳහා ගිනි නිවන භටයින් රැසක් සැනින් ක්‍රියාත්මක වූ බවයි විදෙස් මාධ්‍ය වාර්තා වැඩිදුරටත් සඳහන් කරන්නේ.