ඩුබාහිදී ඇල්ලූ ‘ටින්කර්’ රඳවා ගෙන ප්‍රශ්න කරන්න අවසර
(යක්කලමුල්ල – සඳනුවන් කීර්ති)
ගිනි අවියකින් වෙඩි තබා පුද්ගල ඝාතනයක් සිදු කිරීම සහ තවත් පුද්ගලයෙකුට තුවාල කිරීම සම්බන්ධයෙන් අත්අඩංගුවට ගත් සැකකරුවෙකු වන ශ්‍රී දරන් නෙරංජන් නොහොත් ‘ටින්කර්’ නැමැත්තා වැඩිදුර විමර්ශන සඳහා පැය 24ක කාලයක් රඳවාගෙන ප්‍රශ්න කිරීමට කොළඹ අපරාධ කොට්ඨාසය අවසර ලබා ගෙන ඇති බව පොලිස් මාධ්‍ය කොට්ඨාස පවසයි.
ශ්‍රී ලංකා පොලිසිය, රාජ්‍ය බුද්ධි සේවය සහ එක්සත් අරාබි එමීර් රාජ්‍යයේ ඩුබායි පොලිසිය ඒකාබද්ධව සිදු කළ මෙහෙයුමක ප්‍රතිඵලයක් ලෙස අපරාධ රැසකට සම්බන්ධ මෙම සැකකරු ඩුබායි පොලිස් අත්අඩංගුවට පත්ව, මෙරටට පිටුවහල් කරනු ලැබීය.
මෙම මස පළමු වන දින අලුයම් කාලයේදී මෙම අපරාධකරු කටුනායක ජාත්‍යන්තර ගුවන්තොටුපළේදී අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන පෑලියගොඩ පොලිසිය වෙත භාර දීමෙන් පසු, වැඩිදුර විමර්ශන කටයුතු සඳහා ඔහු කොළඹ අපරාධ කොට්ඨාසය වෙත භාර දී ඇත.
2025.08.19 වන දින පෑලියගොඩ පොලිස් වසමේ ඥාණරතන මාවතේදී සිදු වූ මනුෂ්‍ය ඝාතනය සහ තුවාල කිරීමේ සිද්ධිය සම්බන්ධයෙන් කරුණු වාර්තා කරමින් සැකකරු අද දින අලුත්කඩේ මහෙස්ත්‍රාත් අධිකරණය වෙත ඉදිරිපත් කර තිබේ.
එහිදී, කොළඹ අපරාධ කොට්ඨාසය විසින් අධිකරණයෙන් ඉල්ලා සිටියේ සැකකරු සම්බන්ධයෙන් වැඩිදුර විමර්ශන සිදු කිරීමට පැය 24ක කාලයක් ප්‍රමාණවත් නොවන බැවින් තවත් පැය 24ක කාලයක් කොළඹ අපරාධ කොට්ඨාසයේ රඳවා තබාගෙන විමර්ශන සිදු කිරීමට අවසර ලබා දෙන ලෙස ඉල්ලීමක් කරන ලදී.
එවිට මහෙස්ත්‍රාත් අධිකරණය විසින් එම ඉල්ලීමට අවසර ලබා දී ඇති අතර, ඒ අනුව සැකකරු 2025.10.02 සිට 2025.10.03 දක්වා කාලය තුළ කොළඹ අපරාධ කොට්ඨාසය තුළ රඳවා ගෙන වැඩිදුර විමර්ශන කටයුතු සිදු කිරීමට නියමිතය.
.