හිටපු ඇමැති චන්ද්‍රාණි බණ්ඩාරට එරෙහි අල්ලස් නඩුව යළි 23 වැනිදාට කැඳවයි
(අකිලා නදීෂානි බණ්ඩාර)
දූෂණ චෝදනාවක් සම්බන්ධයෙන් හිටපු ඇමැතිනි චන්ද්‍රාණී බණ්ඩාරට එරෙහිව අල්ලස් කොමිසම විසින් ගොනුකර තිබෙන නඩුව සැප්තැම්බර් 23 වැනිදා යළි කැඳවන ලෙස කොළඹ මහාධිකරණය නියෝග කරයි.
නඩුව කොළඹ මහාධිකරණ විනිසුර සහන් මාපා බණ්ඩාර ඉදිරියේ අද (04) කැඳවනු ලැබීය.
එහිදී අල්ලස් කොමිසම වෙනුවෙන් පෙනී සිටි නීතිඥවරිය අධිකරණය හමුවේ කරුණු දක්වමින් මෙම අධි චෝදනා පත්‍රය සංශෝධනය කිරීමට අවසර ඉල්ලා සිටියාය.
ඊට අධිකරණයෙන් අවසර ලබා දුන් විනිසුරුවරයා සංශෝධිත අධි චෝදනා පත්‍රයේ පිටපතක් විත්තියේ නීතීඥවරුන්ට ලබා දෙන ලෙස නියෝග කළේය.
එම සංශෝධනය කරන ලද චෝදනා පත්‍රය අධ්‍යනය කිරීමෙන් අනතුරුව ඒ සම්බන්ධයෙන් ඉදිරියේ දී මූලික විරෝධතා ගොනු කරන බව ජනාධිපති නිතිඥ නලින් ලද්දුහෙට්ටි මහතා සඳහන් කළේය.
ඉන් අනතුරුව අනතුරුව නඩුව යළි සැප්තැම්බර් මස 23 වැනිදා කැඳවන ලෙසද මහාධිකරණ විනිසුරුවරයා නියෝග කළේය.
විත්තිකාර හිටපු අමාත්‍යවරියට එරෙහිව අල්ලස් කොමිසම විසින් දූෂණ විරෝධී පනත යටතේ චෝදනා 11ක් යටතේ මෙම නඩුව ගොනු කර තිබේ.
2019 ජනවාරි 14 වැනිදා සහ 2019 ජනවාරි 31 කාලය අතර කාල සීමාව තුළ නිසි ක්‍රියාපටිපාටිය අනුගමනය නොකොට එච්.එම්. චන්ද්‍රවංශ නැමැතෙකුට වියළි කලාප සංවර්ධන අමාත්‍යාංශයේ ව්‍යාපෘති අධ්‍යක්ෂ ධූරයට පත් කිරීම සහ සිය හිතවතුන් පිරිසක් නීත්‍යානූකූල නොවන අකාරයට විවිධ තනතුරුවලට පත් කිරීම සඳහා එම අමාත්‍යංශයේ ලේකම්වරයා ඇතුළුව නිලධාරීන්ට බලපෑම් කිරීම තුළින් “දූෂණය” නමැති වරද සිදුකළේ යැයි චෝදනා කරමින් හිටපු අමාත්‍යවරියට එරෙහිව අල්ලස් කොමිසම විසින් මෙම අධි චෝදනා ගොනු කර තිබේ.