වයස අවුරුදු 12ද? එහෙනම් යුධ පුහුණුව

යුක්රේන යුද්ධයත් එක්ක ඇතිවෙලා තියෙන දැඩි සේවක හිඟයට විසඳුමක් හොයන රුසියාව, දැන් වයස අවුරුදු 12ක දරුවන්ටත් වැඩ කිරීමේ අවස්ථාව ලබාදීම ගැන සලකා බලමින් ඉන්නවා.

මොකක්ද මේ යෝජනාව?

මොස්කව් නුවර ළමා අයිතිවාසිකම් කොමසාරිස් Olga Yaroslavskaya කියන්නේ පාසල් නිවාඩු කාලයේ දරුවන්ට වැඩ කිරීමේ අවස්ථාව ලබාදිය යුතු බවයි.

ඇයගේ යෝජනාව වන්නේ සෝවියට් සමයේ තිබුණු ළමා ශ්‍රම කඳවුරු වැනි වැඩසටහන් නැවත ක්‍රියාත්මක කිරීමයි.

තමන් පාසල් කාලයේ තක්කාලි වතුවල වැඩ කර මුදල් උපයාගත් බවත්, එවැනි අත්දැකීම් දරුවන්ටත් ලැබිය යුතු බවත් ඇය පවසනවා.

දැනට රුසියානු නීතිය අනුව දරුවන්ට රැකියාවක් කළ හැක්කේ වයස අවුරුදු 14න් පසුවයි. නමුත් සේවක හිඟය නිසා එම නීති සංශෝධනය කිරීම ගැනද අවධානය යොමු වී තිබෙනවා.

රුසියාවට සේවක හිඟයක් ඇතිවුණේ ඇයි?

විශේෂඥයන් පවසන්නේ රටේ ආර්ථිකයට මේ වන විට අමතර සේවකයන් මිලියන 1.5ක් පමණ අවශ්‍ය බවයි.

ඒ සඳහා ප්‍රධාන හේතු කිහිපයක් බලපා තිබෙනවා.

▪️ උපත් අනුපාතිකය අඩුවීම.

▪️ යුද්ධයට බඳවා ගැනීම්වලින් වැළකීමට තරුණයන් විශාල පිරිසක් රට හැර යාම.

▪️ යුක්රේන යුද්ධයේදී රුසියානු හමුදා සාමාජිකයන් විශාල පිරිසක් මිය යාම හෝ තුවාල ලැබීම.

මේ නිසා බොහෝ ආයතනවලට සේවකයන් සොයා ගැනීම දුෂ්කර වී තිබෙනවා.
දරුවන්ට අලුතින් හඳුන්වා දී ඇති දේ මොනවාද?

රැකියා අවස්ථා ගැන කතා කරන අතරම, රුසියානු අධ්‍යාපන අමාත්‍යාංශය දරුවන් සඳහා අනිවාර්ය කියවීම් පොත් ලැයිස්තුවක්ද හඳුන්වා දී තිබෙනවා.

විචාරකයන් පවසන්නේ එම පොත්වලින් යුක්රේන යුද්ධය පිළිබඳ රජයේ මතවාදය ප්‍රවර්ධනය කරන බවයි.

ඒ අතර “Shadows of Donbas” වැනි නව පොත්ද ඇතුළත් කර තිබෙනවා.

සේවක හිඟය පියවීමට ළමා ශ්‍රමය ගැන කතා කිරීම සහ දරුවන් සඳහා මෙවැනි වැඩසටහන් හඳුන්වාදීම, රුසියාව මුහුණ දෙන ජනගහන හා ආර්ථික ගැටලු පිළිබඳව ලෝකයේ අවධානය යොමු කර ඇති බවයි විචාරකයන් පෙන්වා දෙන්නේ.

රටක ආර්ථික ගැටලු විසඳන්න දරුවන්ගේ ශ්‍රමය භාවිත කිරීම ගැන ඔබේ අදහස මොකක්ද? Comment එකකින් කියන්න.