කෝටි 300 මත්ද්රව්ය තොගය ගැන රස පරීක්ෂක වාර්තාවක් කැඳවයි
(අකිලා නදීෂානි බණ්ඩාර)
පසුගියදා නාවික හමුදාව මගින් අත්අඩංගුවට ගෙන දික්ඕවිට ධීවර වරායට රැගෙන එන ලද රුපියල් කෝටි 300 කට අධික වටිනාකමින් යුත් මත්ද්රව්ය තොගය රජයේ රස පරීක්ෂකවරයා වෙත යොමු කර වාර්තාවක් කැඳවන ලෙස කොළඹ ප්රධාන මහේස්ත්රාත් අධිකරණය නියෝග කරයි.
ධීවරයින් එකොලොස් දෙනෙකු සමග අත්අඩංගුවට ගත් කිලෝ ග්රෑම් 263 ක මත්ද්රව්ය තොගය දැඩි ආරක්ෂක විධිවිධාන මැද පොලිස් මත්ද්රව්ය කාර්යාංශය මගින් ඊයේ (2) අධිකරණයට ඉදිරිපත් කලේය.
ඉන් අනතුරුව පොලිසිය ඉදිරිපත් කළ කරුණු සලකා බැලූ කොළඹ ප්රධාන මහෙස්ත්රාත් අසංග එස්. බෝදරගම මහතා අදාළ මත්ද්රව්ය තොගය රජයේ රස පරීක්ෂකවරයා වෙත යොමු කර වාර්තාවක් කැඳවන ලෙස නියෝග කලේය.
ඉකුත් 25 වැනිදා සැකකාර ධීවරයින් එකලොස් දෙනා ගමන් ගත් බහුදින ධීවර යාත්රාවේ තිබී අයිස් මත්ද්රව්ය කිලෝ ග්රෑම් 109.422 සහ හෙරොයින් කිලෝග්රෑම් 112.258ක් අත් අඩංගුවට ගත් අතර එම මත්ද්රව්ය තොගය ආරක්ෂිත උර 15 ක බහා අධිකරණයට ඉදිරිපත් කර තිබුණි.
ඉන් අනතුරුව මහේස්ත්රාත්වරයා කළ නියෝගයට අනුව අධිකරණ රෙජිස්ටාර්වරයාගේ නිරීක්ෂණය යටතේ අදාළ මත්ද්රව්ය තොගය ලාකඩ මුද්රා තබා රජයේ රස පරීක්ෂකවරයා වෙත යොමු කිරීමට ගනු ලැබීය.