ඊශ්‍රායල ප්‍රාණ ඇපකරුවන්ගේ මළ සිරුරු හතරක් හමාස් ඊශ්‍රායලයට බාර දෙයි
ඊශ්‍රායල-හමාස් සටන් විරාම ගිවිසුමේ කොටසක් ලෙස ගාසා තීරයේ සහ බටහිර ඉවුරේ පලස්තීන සිරකරුවන් සහ රැඳවියන් රාත්‍රී හුවමාරුවකින් නිදහස් කරන ලද බව වාර්තා වේ. මෙහිදී ඊශ්‍රායල ප්‍රාණ ඇපකරුවන්ගේ දේහයන් අඩංගු බව කියන මිනී පෙට්ටි හතරක් ඊශ්‍රායලය විසින් පිළිගෙන තිබේ.
ඊශ්‍රායලය සහ හමාස් සංවිධානය අතර දින 42 ක සටන් විරාමයේ අවසාන හුවමාරුවේ ආරම්භය මෙම හුවමාරුව සනිටුහන් කරයි. එය දීර්ඝ කිරීම සඳහා ගිවිසුමක් ඇති කර නොගතහොත් මෙම සති අන්තයේ දී සටන් විරාම ගිවිසුම කල් ඉකුත් වීමට නියමිතය.
මෙම මස මුලදී යුද්ධය ස්ථිර ලෙස අවසන් කිරීම සඳහා සාකච්ඡා ආරම්භ කිරීමට දෙපාර්ශ්වයම අදහස් කළහ. නමුත් එම සාකච්ඡා ආරම්භ වී ඇත්ද යන්න පැහැදිලි නැත.
හමාස් විසින් ඊශ්‍රායල හමුදාවට භාර දී ඇත්තේ ඊශ්‍රායල ප්‍රාණ ඇපකරුවන් ලෙස සිටි ට්සාචි ඉඩාන්, ඉට්ෂාක් එල්ගරාට්, ඕහාඩ් යහලෝමි සහ ෂ්ලෝමෝ මැන්ට්සුර් යන අයගේ මළ සිරුරුය. 2023 ඔක්තෝබර් 7 වන දින හමාස් නායකත්වයෙන් යුත් ප්‍රහාරයේදී ඔවුන් සිව්දෙනා අල්ලා ගන්නා ලදී.
බ්‍රහස්පතින්දා අලුයම ඊජිප්තු මැදිහත්කරුවන් හරහා කෙරෙම් ෂාලොම් හරස් මාර්ගයේදී ඊශ්‍රායල හමුදාවට මෙම මිනී පෙට්ටි හතර භාර දී ඇත. අනතුරුව මළ සිරුරු හඳුනා ගැනීමේ ක්‍රියාවලිය ඊශ්‍රායල භූමියේ ආරම්භ වී ඇති බව රතු කුරුස සංවිධානය පවසයි.
හඳුනාගැනීමේ ක්‍රියාවලිය අවසානයේ නිල දැනුම්දීමක් ලබා දෙනු ඇත. මෙම ප්‍රාණ ඇපකරුවන්ගේ පවුල්වල පෞද්ගලිකත්වයට ගරු කරන ලෙස බෙන්ජමින් නෙතන්යාහුගේ කාර්‍යාලය මහජනතාවගෙන් ඉල්ලා සිටියි.
ඊශ්‍රායලය පලස්තීන සිරකරුවන් සහ රැඳවියන් 642 දෙනෙකු නිදහස් කිරීමට අපේක්ෂා කෙරේ. ඔවුන් අතර චෝදනා නොමැතිව රඳවා සිටින කාන්තාවන් සහ ළමුන් ඇතුළු රැඳවියන්, ජීවිතාන්තය දක්වා සිර දඬුවම් සහ දිගු සිර දඬුවම් විඳිමින් සිටි සිරකරුවන් මෙන්ම දීර්ඝතම කාලයක් සේවය කළ පලස්තීන දේශපාලන සිරකරු ද වේ.
– සඳුනි තිලකරත්න