17වන ජාතික රණවිරු දිනය ජනපති ප්රධානත්වයෙන්අභිමානවත්ව සැමරේ…
- නිදහස් රටක අභිමානය වෙනුවෙන් ජීවිත කැප කළ සියලුම විරුවන් උත්තමාචාර පෙරදැරිව සිහිපත් කරනවා
- ඔවුන්ගේ අපේක්ෂාව වූ සමගිය, සංවර්ධනය, සමෘද්ධිය කරා රට ගෙන යන මාවතේ නොබියව අධිෂ්ඨානශිලීව ඉදිරියටම යනවා.
- “අවිහිංසාව, මෛත්රිය සහ දයාව මත පදනම් වූ බුදු දහම මත පිහිටා චිරාත් කාලයක් කටයුතු කරන අප රට ජාතිකත්වය වෙනුවට මනුෂ්යත්වය උතුරා යන රටක් – මෙතරම් සුන්දර මිනිස් සමාජයකට මොනතරම් විශිෂ්ට රටක් ගොඩනැගිය හැකිද?” – ජනපති
නිදහස් රටක අභිමානය වෙනුවෙන් දිවි හිමියෙන් කටයුතු කළ සියලු විරුවන්ගේ ප්රාර්ථනාව වූ සංවර්ධිත සහ සාමකාමී රටක් පිළිබඳ අපේක්ෂාව දෙවුර මත පවරා ගත් වත්මන් රජය ආදර්ශවත් රටක් ගොඩනැගීමේ අධිෂ්ඨානශීලි ගමනක නිරත වෙමින් සිටින බව ජනාධිපති අනුර කුමාර දිසානායක මහතා පැවසීය.සියලු සත්වයන් කෙරෙහි පවතින අප්රමාණ මෛත්රිය, අවිහිංසාව සහ දයාව මත පදනම් වූ බුදු දහම මත පිහිටා චිරාත් කාලයක් කටයුතු කරන අප රට ජාතිකත්වය වෙනුවට මනුෂ්යත්වය උතුරා යන රටක්
බවත්, මෙතරම් සුන්දර මිනිස් සමාජයකට මොනතරම් විශිෂ්ට රටක් ගොඩනැගිය හැකි දැ’යි ජනාධිපතිවරයා ප්රශ්න කළේය.
විනාශකාරිත්වයේ පැරණි ගෝත්රිකවාදී එකිනෙකා අතර වෛරය, ක්රෝධය වපුරන මාවත වෙනුවට රට සමගිය, සංවර්ධනය සහ සමෘද්ධිය කරා ගෙන යමින් ජනතාවගේ ජීවිත සුරක්ෂිත කරන මාවත වත්මන් රජය තෝරාගෙන තිබෙන බවත්, එම මාවතේ නොබියව සහ අධිෂ්ඨානශිලීව ගමන් කරමින් රට ජයග්රහණය කරා ගෙන යාමට කටයුතු කරන බවද ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව සඳහන් කළේ අද (19) පස්වරුවේ බත්තරමුල්ල, රණවිරු ස්මාරකය අබියස අභිමානවත්ව පැවැත්වුණු 17වන ජාතික රණවිරු දින සැමරුම අමතමිනි.
රණවිරු සේවා අධිකාරිය විසින් වාර්ෂිකව සංවිධානය කෙරෙන මෙම සැමරුම සඳහා මෙවර රණවිරු පවුල් වැඩි සංඛ්යාවකට ඉඩ ලබා දී තිබීමද විශේෂත්වයකි.
මෙහිදී වැඩිදුරටත් අදහස් දැක් වූ ජනාධිපති අනුර කුමාර දිසානායක මහතා,
අපි සියලු දෙනා එක් වී සිටින්නේ මෑත ඉතිහාසයේ මව්බිම නිදහස් කර ගැනීම සඳහා උර දුන් අපේ විරුවන්ට උත්තමාචාරය සහ ගෞරවය පුද කිරීමටයි.
රට වෙනුවෙන් තම ජීවිත පූජා කළ විරුවන් මේ රණවිරු ස්මාරකය ඉදිරිපිටදී සිහිපත් කිරීම සහ ඔවුන් විසින් ප්රාර්ථනා කරන ලද අරමුණු ඉටු කිරීම වෙනුවෙන් යුද්ධය අවසන් වී වසර 17ක් වන අද දින අප මේ සමුළුව පවත්වනවා.
නිදහස් රටක අභිමානය වෙනුවෙන් ජීවිත සහ ලේ කදුළුවලින් මිල ගෙවූ සියලුම විරුවන් මේ මොහොතේ උත්තමාචාරය පෙරදැරිව සිහිපත් කරනවා. තමන් වෙනුවෙන් නොව අන් අය සහ රට වෙනුවෙන් ජීවිත පරිත්යාග කරමින් ඔවුන් ඉටු කළ මෙහෙවරට දේශයේ ප්රණාමය සහ ගෞරවය පුද කරනවා.
විශේෂයෙන්ම, මෙවැනි වීරෝදාර විරුවන් මේ මව්බිමට දායාද කළ දෙමාපියන්ට, අපේ ගෞරවයත්, උත්තමාචාරයත් පුද කළ යුතුයි. මේ සැමරුමට ඔබ විවිධාකාරයෙන් සහභාගී වන්නට ඇති. මෙම රණවිරු ස්මාරකය මත ඇති දහස් ගණනක් නම් අතර ඔබ සොයන්නට ඇත්තේ ඔබට අහිමි වූ ඔබේ පියා විය හැකියි. එසේ නොමැති නම් ඔබේ සැමියා, පෙම්වතා, ඥාතියා, සහෝදරයා විය හැකියි. එසේත් නැතිනම් ඔබේ හොඳම මිතුරා හෝ ළඟම හිතවතා විය හැකියි. ඔවුන් සිය ජීවිතය කැප කළේ ඔබේ, මගේ රටේ ආරක්ෂාව වෙනුවෙන් වගේම තවත් විශාල අරමුණු පෙරදැරි කරගෙනයි.
ජීවිතය පරිත්යාග කළා හා සමාන ලෙසම තමන්ගේ ශරීර කොටස් පරිත්යාග කළ සොහොයුරන් සැමදා අපගේ හදවතේ වීරත්වයෙන් වැජඹෙන බව මම කියන්න කැමතියි. ඔබ කරන ලද උත්තුංග පරිත්යාගයේ සහ කැපකිරීම්වල ප්රතිඵල අද අපි රටක් ලෙස අත්විඳිමින් සිටිනවා.
ඔබගේ පරිත්යාගය, කැපකිරීම නොතිබෙන්නට අපි තවමත් සැලකිය යුතු ප්රමාණයකින් බියජනක රාජ්යයක ජීවත් වෙනවා. ඔබ මේ මාතෘභූමිය නිදහස් කර ගැනීමේ සටනේදී විශාලතම කාර්යභාරය ඉටු කරන ලද පිරිස ලෙස ඉතිහාසයට එක් වන බව අපිට විශ්වාසයයි. හැබැයි, ඒ පරිත්යාගය තුළ තවත් අරමුණු බොහෝ ප්රමාණයක් ගැබ් වී තිබුණා. ඒ අරමුණු නම් සාමකාමී රටක්. යුද්ධය සහ ගැටුම් සහිත රටක් ප්රතික්ෂේප කිරීමේ ප්රධානම කණ්ඩායම වන්නේ ඔබයි. ඔබ දන්නවා යුද්ධය මොන තරම් විනාශකාරීද, බිහිසුණුද කියලා. ඒ නිසා මේ මාතෘභූමිය තුළ යුද්ධය ප්රතික්ෂේප කර සාමකාමීත්වය නිර්මාණය කිරීම වෙනුවෙන් විශාලතම අඬහැරය සහ විශාලතම ප්රාර්ථනාව තිබෙන්නේ ඔබ තුළ කියා මම විශ්වාස කරනවා.
ඒ වගේම සංවර්ධිත රටක් අවශ්යයි.මේ මාතෘ භූමිය නිදහස් කර ගැනීමේ සටනේදී මාතෘභූමිය නිදහස් කර ගැනීම හා සමාන ලෙසම අපේ රට සංවර්ධිත රාජ්යයක් බවට පත් කර ගැනීමේ අරමුණ ඔබට තිබුණා. ඒ වගේම, සර්ව සාධාරණත්වය පිරි, නීතිය අගයන රටක්. ලෝකය දිනන රටක් ඔවුන්ගේ මරණාසන්න ප්රාර්ථනාවක්. ඔවුන් ජිවිතය පූජා කළේ එම ප්රාර්ථනාවන් සහිතව.ඔවුන් ප්රාර්ථනා කළ අනාගතය නිර්මාණය කිරීමේ වගකීම අපි භාරගන්නා බව මම මේ රණවිරු ස්මාරකය ඉදිරිපිට ශපථ කර ප්රකාශ කරනවා. ඔවුන්ගේ ප්රාර්ථනා කිසිසේත්ම පාවා නොදෙන බවට මම ශපථ කරනවා.
සෑම විජයග්රහණයක්ම සමරන මොහොතක අප සිහිපත් කළ යුතු දෙයක් තිබෙනවා. ගේ දොරකඩට වී තම පියා එනතුරු බලා සිටින දූ දරුවන් තවමත් සිටිනවා. ඔවුන්ට කිසිදාක තම පියාගේ සෙනෙහස ලබා ගැනීමට වරමක් ලැබෙන්නේ නැහැ. ඒ වගේම, තම සැමියා අහිමි වූ බිරින්දෑවරුන්ගේ වේදනාව ඇගේ මුළු ජීවිත කාලය පුරාම රැව් පිළිරැව් දෙනවා. නැවත ඇයට ඇගේ ස්වාමියා ලැබෙන්නේ නැහැ. එය අපි දන්නවා. ඒ වගේම අහිමි වූ දරුවාගේ මතකය සමග අනෙක් දරුවන් දෙස බලා සිටින මව්වරුන්, පියවරුන් සිටිනවා. එම මව්වරුන්ට, පියවරුන්ට තම දරුවා නැවත ලැබෙන්නේ නැති බව අපි දන්නවා. මේ සියලු දෙනා එක්ව රණවිරු ස්මාරකය මත ඔහු සොයනවා. තම හදවතේ ගැඹුරු තැන තමන්ගේ ස්වාමියා, දරුවා, සොහොයුරා, තැන්පත් වී ඇති බව සැබෑවක්. එහෙත්, මේ රණවිරු ස්මාරකය ඉදිරිපිට තිබෙන නම සොයාගෙන පපුවට අත තබාගෙන සුසුම් හෙළනවා. මෙම සංවේදීතාවට පිළිතුරක් ලබා දීමට අපිට පුළුවන්ද? අහිමි වූ වීර සෙබළ සෙබළියන් සැමරීමට අපිට කළ හැකි වන්නේ ඔවුන් විසින් කරන ලද වටිනා කැපකිරීමට ආචාරය පුද කිරීම පමණක්ද? මේ කැපකිරීම් ස්මරණය කිරීමෙන් පමණක් සෑහීමකට පත්විය හැකිද? මේ කැපකිරීම්වලට උත්තමාචාරය පුද කිරීම පමණක් ප්රමාණවත්ද, ඔවුන් විසින් ප්රාර්ථනා කරන ලද රාජ්යය ගොඩනැගීමේ වගකීම ජිවත් වී සිටින අපිට පැවරී තිබෙනවා.
සෑම උවදුරකදීම සහ සෑම තර්ජනයකදීම ඔවුන් දේශයේ ආරක්ෂාව වෙනුවෙන් පෙරට ආවා. සතුරු උවදුරකදී වේවා, ස්වභාවික ව්යසනයකදී වේවා, ඔවුන් ඔවුන්ගේ ජිවිත පරිත්යාගයේ අද්විතීය මෙහෙවර ඉටු කර තිබෙනවා. යුද්ධයේදී රට ගලවා ගැනීමේදී වගේම ව්යසනයකදී ජීවිත ගලවා ගැනීමටත් ඔවුන් කැපකිරීම් කළ බව අපි දන්නවා. ඒ නිසා ඔවුන් සැමදා අපේ හදවත් තුළ අනුස්මරණීයයි කියන සහතිකය අපි ලබා දෙනවා.
පසුගිය වසරේ මා සඳහන් කළ පරිදි අපි සන්ධිස්ථානයක සිටගෙන සිටිනවා. නොදැනුවත්කමට වඩා දැනුම සොයාගත යුතුයි. අසමගියට වඩා එකමුතුකම ගොඩනැගිය යුතුයි. එකතැන පල්වීමට වඩා ප්රගතිය වෙත ගමන් කළ යුතුයි. මා එදා කියූ පරිදිම අපිට මේ සන්ධිස්ථානයේ මාවත් දෙකක් තිබෙනවා. එක මාවතක් වන්නේ විනාශකාරිත්වයේ පැරණි ගෝත්රිකවාදී එකිනෙකා අතර වෛරය, ක්රෝධය වපුරන මාවත. අනෙක් මාවත වන්නේ මේ රට සමගිය, සංවර්ධනය, සමෘද්ධිය කරා ගෙන යමින් ජනතාවගේ ජීවිත සුරක්ෂිත කරන මාවත. මා හිතනවා අසීරුතම මොහොතේ හෝ අප තෝරාගන්නේ දෙවනුව මා සඳහන් කළ මාවතයි. ඒ මාවතේ නොබියව අධිෂ්ඨානශිලීව ගමන් කිරීමට මා ඔබ ඉදිරියේ ශපථ වෙනවා.
මේ පරිවර්තනය වෙනුවෙන් ඉතිහාසයේ පළමුවරට ජනතාවට වග කියන, ජනතාවගේ ජනරජයක් බිහි වී තිබෙනවා. ඒ ජනරජය වචනයේ පරිසමාප්ත අර්ථයෙන්ම ජනතාවගේ. ස්ථීර වශයෙන් මතු පරම්පරාව වෙනුවෙන්. අද අපි ගමන් කරමින් සිටින්නේ මානවවාදී ශ්රී ලාංකික ජාතියක් ගොඩනැගීම කරා යන ගමනයි. ඒ ගමන අධිෂ්ඨානයෙන් පිරුණු ඔරොත්තු දීමේ ගිනි දැල් මත ගොඩනැගුණු ගමනක් බව සිහිපත් කළ යුතුයි. ඒ ගමන අසාමාන්ය දුෂ්කරතා සහ කම්කටොළු මත වැටී ඇති බව සිහිපත් කළ යුතුයි. එහෙත් මේ දුෂ්කර ගමනේ අවසාන අරමුණ මේ රට දීප්තිමත් ආදර්ශමත් රටක් බවට පත් කිරිම බව සිහිපත් කළ යුතුයි. මේ රණවිරුවන්ගේ ප්රාර්ථනාවද එයයි. එම ප්රාර්ථනාව ඉටු කිරීමේ වගකීම අපිට තිබෙනවා.
අද අපි ඉදිරියට ගෙන යන්නේ අප අතර ඇති මනුෂ්යත්වය නොබෙදිය හැකි ආත්මයයි. අපි ජාත්යන්තර වේදිකාවේ ශ්රී ලංකාවේ ප්රතිරූපය වැඩිදියුණු කරමින් සිටිනවා. අපේ රට නීතීය, අධිකරණයේ ස්වාධීනත්වය අගයන රටක් බවට පරිවර්තනය කර තිබෙනවා. මේ රට බේරා ගැනීම වෙනුවෙන් දිවිහිමියෙන් කටයුතු කළ සියලු දෙනාගේ ප්රාර්ථනාව අපේ දෙවුර මත තබාගෙන ආදර්ශවත් රටක් ගොඩනැගීමේ අධිෂ්ඨානශීලි ගමනක අප නිරත වෙමින් සිටිනවා.
යුද්ධයට ලෝකය කැබිලිවලට පුපුරුවා හැරිය හැකියි. එහෙත් සාමයට කළ හැක්කේ ලෝකය එකතු කිරීමයි. මළ සිරුරු ගොඩවල් මත මිනිස් සමාජයක් නිර්මාණය කරන්න බැහැ. ලේ ගංගා මැද සාමයේ දේවාල නිර්මාණය කරන්න බැහැ. පිපිරෙන බෝම්බ සහ වෙඩි උණ්ඩ මත මතු පරපුරට සැනසිලිදායක රටක්, ලෝකයක් ඉතිරි වන්නේ නැහැ. යුද්ධය ඛේදවාචකයක්. ඒ නිසා අපි යුද්ධයේ කතාව ඉතිහාසයට පවරා සාමයේ තිරසාර වන්දනාව වර්තමානයට එකතු කරගෙන තිබෙනවා.
අපේ රටේ ත්රිවිධ හමුදාව ඇතුළු ආරක්ෂක අංශ තමන්ගේ යුතුකම ඉටු කළා. ඔවුන් යුද්ධ කළේ බෙදුම්වාදයට එරෙහිව. මේ මාතෘභූමිය සිංහල, දෙමළ, මුස්ලිම් අපි සියලු දෙනාට ඕනෑම තැනක ජීවත් විය හැකි අයිතිය තහවුරු වී තිබෙන මාතෘභූමියක්. එම මාතෘභූමිය බෙදා වෙන් කිරීමට එරෙහිව ඔබ සටන් කළා. ඔවුන් යුද්ධ කළේ ජාතියකට විරුද්ධව නොවෙයි. යුද්ධයේ බිහිසුණු ප්රතිවිපාක සියලු ජාතීන්ට අත්විඳීමට සිදු වුණා. එකම රටක තරුණයන් මේ යුද්ධය නිසා අහිමි වුණා.
අවස්ථාවාදී බලලෝභී දේශපාලකයන්ගේ අන්තවාදී කැත පන්නයේ න්යාය පත්රය නිසා එකම රටක මිනිස්සු දෙකට බෙදුණා.
දේශපාලන අශිෂ්ටත්වය මනුෂ්යත්වයේ පාපන්දුවක් බවට පත් වුණා. අදත් සමහරු යුද්ධය හොඳද නරකද කියා තර්ක කරනවා. මා යුද්ධය හොඳද, නරකද කියා විනිශ්චයක් දෙන්න සුදානම් නැහැ. හැබැයි මම නැවත කිසිදිනෙක යුද්ධයක් ඇති නොවන බවට වගබලා ගන්නවා. මා ඉදිරිපිට සිටින විරුවන්ගේ ප්රාර්ථනාවද එයයි. මා සහ මගේ රජය පෙනී සිටින්නේ යුද්ධය හොඳද, නරකද කියා වගවිභාග කිරීමට නොවෙයි. මා සහ මාගේ රජය පෙනී සිටින්නේ නැවත යුද්ධයක් ඇති නොවන ලෙස වගබලා ගැනීමටයි. රණවිරුවන්ගේ සහ මේ රටේ සියලු දේශප්රේමි ජනතාවගේ ප්රාර්ථනය එය කියා මම විශ්වාස කරනවා.
ඒ වගේම සිංහල, දෙමළ, මුස්ලිම්, බර්ගර්, මැලේ සෑම පුරවැසියෙකුටම සමාන වරප්රසාද සහිතව ජීවත් වීමේ නිදහස සහතික විය යුතුයි. මිනිස් අයිතිවාසිකම්, මිනිස් වගකීම්, වරප්රසාද සියල්ලන්ටම එකයි යන හැඟීම සමස්ත ජීවිතවලට ඇතුළත් විය යුතුයි. අපේ සාමජය පුරුදු වී තිබුණා එක්කෝ මහා බල අධිකාරින් ඉදිරිපිට දණගහගෙන ජීවත් වීමට. එසේ නැතිනම් බියට පත් වී ජීවත් වීමට.ඇතැම් කණ්ඩායමකට නිදහස්, ප්රජාතන්ත්රවාදී රාජ්යයක ජීවත් වීමට පුරුදු නැහැ. ඔවුන් කැමති ගැටුම්, අපහාස, අවලාදවලට. එහෙත් අපි කැප වී සිටිනවා ප්රජාතන්ත්රවාදී සහ නිදහස් රාජ්යයක් වෙනුවෙන්.
හැකියාව, දක්ෂතාව සහ කුසලතාව ඇති සියලු දෙනාට ඉදිරියට ආ හැකි රටක් නිර්මාණය කළ යුතුයි. විශේෂ වරප්රසාදවලින් වැජඹුණු සමහරුන්ට එය වේදනාවට කාරණයක් විය හැකියි. තමන් විශේෂයි කියා සිතමින් අනෙකා පීඩාවට පත් කළ අය තවදුරටත් විශේෂ නොවීම නිසා කලබල විය හැකියි. ඉතිහාසයේ කිසිදා නොවූ ලෙස තරාතිරම නොබලා නීතිය හඹා ඒම ගැන ඔවුන් වියරු වැටිය හැකියි. එහෙත් අපි සර්ව සාධාරණත්වය උදෙසා කොන්දේසි විරහිතව කැප වී සිටිනවා. ජනතා අභිලාෂයන් තිරසාරව ඉටු කරනවා.මේ මියගිය විරුවන්ගේ ප්රාර්ථනාවද එයයි.
අපි මේ සැමරුම සිදු කරන මාසය ආගමික වශයෙන් සුවිශේෂී මාසයක්. ලෝකයට කරුණාව, මෛත්රියේ සහ සාමයේ පණිවිඩය ලබා දුන් බුදුන්වහන්සේගේ තෙමඟුල අපි මේ මාසයේ සමරනවා. බුදු දහම පදනම් වන්නේ අවිහිංසාව, දයාව සහ සියලු සත්වයන් කෙරෙහි පවතින අප්රමාණ මෛත්රිය මතයි. අපේ රට චිරාත් කාලයක් මුළුල්ලේ මේ උදාර ධර්මය මත පිහිටා කටයුතු කරනවා. එහෙත් තමන්ගේ බලය සහ වුවමනා වෙනුවෙන් වෛරය, ක්රෝධය වපුරන ඉතා සුළුතර පිරිසක් සිටින බව අපි දන්නවා.
ශ්රී ලංකාව සතු බහුවිධ සංස්කෘතික චිත්රයක් තිබෙනවා. වසර දහස් ගණනක් තිස්සේ ශ්රී ලංකාව විවිධ ජනවාර්ගික, සංස්කෘතික, ආගමික සහ භාෂා කණ්ඩායම් සඳහා අපූරු නවාතැනක් වී තිබෙනවා. පශ්චාත් යුද සමයක ශ්රී ලංකාව එහි වේදනාකාරී අත්දැකීම්වලින් එතෙර වීමට උත්සාහ ගනිමින් සිටිනවා. යුද්ධය ඉතාමත් වේදනාකාරී අත්දැකීමක්. එම වේදනාව අපේ මතු පරපුරට උරුම නොකිරීම සඳහා අපි කටයුතු කරමින් සිටිනවා. තිරසාර සාමය සහ සහජීවනය සඳහා පාලම් ගොඩනගමින් සිටිනවා. විවිධත්වය පිළිගැනීම සහ වෙනස්කර නොසැලකීම මගින් තිරසාර සාමය සහ සහජීවනය සඳහා ඒ පාලම් දායකත්වයක් සපයනවා.
ලෝකප්රකට ශ්රී පාදස්ථානයේ සියලු ආගමික බැතිමතුන් වන්දනා කරනවා. පොළොන්නරුව යුනෙස්කෝ ලෝක උරුම නගරයේ බෞද්ධ ආරාම තුළ හින්දු සිද්ධස්ථාන තිබෙනවා. කතරගම දේවාලය බෞද්ධ, හින්දු සහ ඉස්ලාම් බැතිමතුන්ගේ පූජනීය ස්ථානයක් වෙනවා. උතුරේ යාපනයෙන් ආරම්භ වී දකුණේ කතරගමින් ආරම්භ වන පුජනීය පාද යාත්රාවකට සියලු බැතිමතුන් එකතු වෙනවා. කිරි වෙහෙර වඳින්න යන බැතිමතුන් දේවාලයටත් යනවා. ස්වභාවික ව්යසනයක් හමුවේ ජාතිකත්වය වෙනුවට මනුෂ්යත්වය උතුරා යනවා. නැති බැරි මොහොතක කිසිදු භේදයකින් තොරව මිනිස්සු උපකාර කරනවා.
මෙතරම් සුන්දර මිනිස් සමාජයකට මොනතරම් විශිෂ්ට රටක් ගොඩනැගිය හැකිද? අප විසින් අත්විඳින ලද විනාශයන් ඉතිහාසයට සීමා කළ යුතු යුගය උදා වී තිබෙනවා. අපි දශක ගණනාවක් පුරා ආර්ථික යුද්ධයක ගිලී සිටිනවා. අපි ඒ යුද්ධය ජය ගත යුතුයි. අපි දශක ගණනාවක සිට විරැකියාවේ යුද්ධයක ගිලී සිටිනවා. අපි ඒ යුද්ධය ජයගත යුතුයි. තරුණ පරපුර නිදහස් නිවහල් රටක් ප්රාර්ථනා කරනවා. අපි එය ජයගත යුතුයි.
අපේ රටේ දරු පරපුරට විශිෂ්ට රටක් හිමි කර දීමේ යුද්ධයක අපි ගිලී සිටිනවා. කිසිවක් නොදන්නා දරුවන්ට, දෙමාපියන්ගේ සෙනෙහස, රැකවරණය නොලැබුණු කළ රටක් සිය අනාගතය දිනන්නේ කසේද? අපි ඒ යුද්ධය ජයගත යුතුයි. සෑම පුරවැසියෙකුටම සමාන ලෙස සාධාරණත්වයෙන් සලකන හැම දෙනාගේම මාතෘ භූමිය ලෙස සලකන රටක් බිහි කිරීමේ යුද්ධය අපි ජයගත යුතුයි.
දශක ගණනාවක යුද්ධය නිමා කරමින් මේ රටේ දෙකෝටියක් ජනතාවගේ කදුළු පිස දැමූ සියලු දෙනාට අපගේ උත්තමාචාරය පිරිනමනවා. එහිදී රණවිරුවන් ඉටු කළ මෙහෙය විශිෂ්ටයි. ඔබගේ එම උත්තුංග කාර්යය වෙනුවෙන් ඔබට නැවත නැවතත් අපේ ගෞරවය පුද කරනවා.
තවදුරටත් යුද්ධයක වචනයක් නෑසෙන සාමයේ පිරුණු, නිවහල් රටක පෙරට යාමට මම ඔබට ආරාධනා කරනවා. ඒ වගේම ජාතිවාදයේ ගෝරනාඩුව, ආගමික අන්තවාදයේ ගෝරනාඩුව සහ කුඩා කැළඹිලි සහගත කණ්ඩායම්වල ගෝරනාඩුව අපි අවසන් කළ යුතුයි. මේ රට කිසිසේතම යළි කවර හෝ ජාතිවාදී, අන්තවාදී කණ්ඩායමක ගොදුරක් බවට පත්වීමට ඉඩ නොදිය යුතුයි. ඒ වෙනුවෙන් එක් වන ලෙස මම සියලු දෙනාට ආරාධනා කරනවා.
නියෝජ්ය ආරක්ෂක අමාත්ය විශ්රාමික මේජර් ජෙනරල් අරුණ ජයසේකර, මහජන ආරක්ෂක සහ පාර්ලිමේන්තු කටයුතු නියෝජ්ය අමාත්ය සුනිල් වටගල, ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා(විශ්රාමික), මහජන ආරක්ෂක අමාත්යාංශයේ ලේකම් රවී සෙනෙවිරත්න යන මහත්වරුද, ත්රිවිධ හමුදාපතිවරු, හිටපු හමුදාපතිවරු, පොලිස්පති, සිවිල් ආරක්ෂක දෙපාර්තමේන්තුවේ අධ්යක්ෂ ජෙනරාල් සහ ජාතික ශිෂ්යභට බලකායේ අධ්යක්ෂ ඇතුළු ජ්යෙෂ්ඨ හමුදා නිලධාරීන් මෙන්ම, මියගිය සහ රණක්ෂිතයට පත් රණවිරුවන්ගේ පවුල්වල සාමාජිකයින් ඇතුළු පිරිසක් මෙම අවස්ථාවට එක්ව සිටියහ