විද්යා ඝාතන නඩුවෙන් මරණ දඬුවම නියම වූ ජෙයකුමාර් බන්ධනාගාරය තුළ දී සියදිවි නසා ගනියි
යාපනයේ විද්යා දැරියගේ ඝාතන සිද්ධිය කියන්නේ, ශ්රී ලංකාවම කම්පා කරපු අතිශය සංවේදී සහ ආන්දෝලනාත්මක නඩුවක්. දැන් ඒ නඩුවට සම්බන්ධව අලුත්ම තොරතුරක් වාර්තා වෙලා තියෙනවා.
මේ සිද්ධියේ දෙවන විත්තිකරු ලෙස නම් කරලා තිබුණු පූබාලසිංහම් ජෙයකුමාර් කියන පුද්ගලයා, බන්ධනාගාර කුටිය තුළ ගෙල වැලලාගෙන සියදිවි හානි කරගෙන තිබෙනවා.
මේක වෙලා තියෙන්නේ, ඔහුට එරෙහිව නියම කර තිබුණු මරණ දඬුවම ශ්රේෂ්ඨාධිකරණය විසින් ස්ථිර කරලා, ඒ තීන්දුව යාපනය මහාධිකරණයේදී නිල වශයෙන් කියවීම සඳහා වැලිකඩ බන්ධනාගාරයෙන් යාපනය බන්ධනාගාරයට ගෙන ගිය අවස්ථාවේදීයි.
බන්ධනාගාර මාධ්ය ප්රකාශකවරයා කියලා තියෙන්නේ, අද උදේ නිලධාරීන් කුටිය පරීක්ෂා කරන්න ගිය වෙලාවේ ඔහු ගෙල වැලලාගෙන මියගොස් සිටින අයුරු දැක තිබුණු බවයි.
මේ නඩුව 2015 වසරේදී මුළු රටම කැළඹූ සිද්ධියක්. යාපනයේ පුංකුඩුතීවූ ප්රදේශයේ ජීවත් වූ 18 හැවිරිදි පාසල් දැරියක් වන සිවලෝගනාදන් විද්යා පැහැරගෙන ගොස් සමූහ දූෂණයට ලක් කරලා අමානුෂික ලෙස ඝාතනය කර තිබුණා.
ඒ වෙලාවේ මේ සිද්ධියට එරෙහිව උතුර පුරා විශාල ජනතා විරෝධතාත් ඇතිවුණා. පස්සේ සැකකරුවන් 9 දෙනෙකු අත්අඩංගුවට ගත්තා.
2017 සැප්තැම්බර් 27 වෙනිදා, යාපනය මහාධිකරණයේ ත්රිපුද්ගල විනිසුරු මඩුල්ල තීන්දු කළේ, ස්විස් කුමාර් ඇතුළු චූදිතයන් 7 දෙනෙකු වරදකරුවන් බවට පත් කරමින් මරණ දඬුවම නියම කරන්නයි.
ඒ විතරක් නෙවෙයි, වසර 30ක බරපතළ වැඩ සහිත සිර දඬුවම්, විද්යා දැරියගේ පවුලට වන්දි මුදල් ගෙවීම සහ නඩු ගාස්තු ගෙවීමත් නියෝග කළා.
ඒ තීන්දුවට එරෙහිව පස්සේ ශ්රේෂ්ඨාධිකරණයට අභියාචනා ඉදිරිපත් වුණා. දීර්ඝ කාලයක් විභාග වුණු මේ නඩුවේ අවසාන තීන්දුව 2026 මැයි 06 වෙනිදා ප්රකාශයට පත් කළා.
අගවිනිසුරු ප්රීති පද්මන් සූරසේන මහතා ඇතුළු පංච පුද්ගල විනිසුරු මඩුල්ලක් ඒකමතිකව තීන්දු කළේ, ප්රධාන විත්තිකරුවන් 4 දෙනෙකුට නියම කර තිබුණු මරණ දඬුවම ස්ථිර කරන්නයි.
ඒ අතරින් පූබාලසිංහම් ජෙයකුමාර් කියන විත්තිකරු තමයි දැන් සියදිවි හානි කරගෙන මියගොස් තිබෙන්නේ.
මේ නඩුවට සම්බන්ධ තවත් විත්තිකරුවෙකු වන පූබාලසිංහම් තේවකුමාර් හෙවත් “සෙන්දිල්” කියන පුද්ගලයාත් මීට කලින් මියගොස් තිබුණා.
මේ අතර, මරණ දඬුවම නියම කරලා තිබුණු තවත් දෙදෙනෙකුගේ දඬුවම් ඉවත් කරමින් ඔවුන් නිදොස් කොට නිදහස් කරන්නත් ශ්රේෂ්ඨාධිකරණය නියෝග කළා.
තවත් විශේෂ කරුණක් වෙන්නේ, මේ නඩුවේ ප්රධාන සැකකරුවෙකු වූ “ස්විස් කුමාර්”ට පැන යාමට ආධාර කළ බවට චෝදනා ලැබූ එවක උතුරු පළාත භාර ජ්යෙෂ්ඨ නියෝජ්ය පොලිස්පති ලලිත් ජයසිංහටත් 2025දී වසර 4ක බරපතළ වැඩ සහිත සිර දඬුවමක් නියම වීමයි.
ඒ වගේම ඔහුට රුපියල් 50,000ක දඩයක්ද නියම කර තිබුණා.