අවුරුදු උත්සවයේ ගැටුමකදී මල්ලී බේරගන්න මැද්දට පැන්න පොලිසියේ අයියා මරුට

වලස්මුල්ල, බෝවල පැත්තේ තිබ්බ බක්මහ උළෙලක් අන්තිමට ඇතිවුණු ගැටුමක්, එක ජීවිතයක්ම ගන්න තරම් බරපතළ වෙලා තියෙනවා.

මේ සිද්ධියෙන් බරපතළ තුවාල ලැබුවේ මාලිගාවත්ත පොලිසියේ සේවය කළ 46 හැවිරිදි පොලිස් සැරයන්වරයෙක්. ඔහු තිදරු පියෙක් වගේම, වලස්මුල්ලේම පදිංචි කෙනෙක්.

කතාව මෙහෙමයි—උළෙල ඉවර වෙලා පිරිසිදු කරන වෙලාවේ, ඔහුගේ සහෝදරයාට පිරිසක් පහර දෙනවා කියලා ආරංචි වෙලා. ඒක අහලා ඔහු ඉක්මනටම තමන්ගේ වාහනයෙන් එතැනට එයි.

එතැනදී සහෝදරයා බේරගන්න උත්සාහ කරන වෙලාවේ, එතන හිටපු කෙනෙක් තියුණු ආයුධයකින් පහර දීලා තියෙනවා. ඒ ප්‍රහාරයෙන් ඔහු බරපතළ තුවාල ලබනවා.

මුලින් වලස්මුල්ල රෝහලටත්, පස්සේ මාතරටත්, අන්තිමට කරාපිටිය මහ රෝහලටත් මාරු කරලා දැඩි සත්කාර ඒකකයේ ප්‍රතිකාර දීලා තිබුණත්, ඊයේ (24) ඔහු ජීවිතක්ෂයට පත්වෙලා තියෙනවා.

සිද්ධිය ගැන තවමත් වලස්මුල්ල පොලිසිය විමර්ශන කරගෙන යනවා.

මේ අතර, මියගිය සැරයන්වරයාගේ අවසන් කටයුතු හෙට (26) පොලිස් ගෞරව සමඟ සිදු කිරීමට නියමිතයි.