හංගේරියාව ජාත්‍යන්තර අපරාධ අධිකරණයෙන් ඉවත් වීමට සැරසෙයි
හංගේරියානු රජය ජාත්‍යන්තර අපරාධ අධිකරණයෙන් (ICC) ඉවත් වන බව නිවේදනය කර තිබේ.
ICC හි අත්අඩංගුවට ගැනීමේ වරෙන්තුවක් යටතේ සිටින ඊශ්‍රායල නායක බෙන්ජමින් නෙතන්යාහු රාජ්‍ය සංචාරයක් සඳහා හංගේරියාවට පැමිණ පැය කිහිපයකට පසු අගමැති වික්ටර් ඕර්බන්ගේ රජයේ ජ්‍යෙෂ්ඨ නිලධාරියෙකු විසින් මෙම පියවර නිවේදනය කරන ලදී.
පසුගිය නොවැම්බර් මාසයේදී නෙතන්යාහුට එරෙහිව මෙම වරෙන්තුව නිකුත් කළ වහාම ඕර්බන් නෙතන්යාහුට සිය රටට පැමිණෙන ලෙස ආරාධනා කර තිබුණි. ඒ එම තීන්දුව ඔහුගේ රට තුළ කිසිදු බලපෑමක් ඇති නොකරන බව පවසමිනි.
නොවැම්බර් මාසයේදී ඊශ්‍රායලය සහ හමාස් අතර වූ යුද්ධයේදී යුද අපරාධ සහ මනුෂ්‍යත්වයට එරෙහි අපරාධ සම්බන්ධයෙන් නෙතන්යාහු වගකිව යුතු බවට අයිසීසී විනිසුරුවන් පැවසූහ. ඒ බවට සාධාරණ සාක්ෂි ද ඇති බව ඔවුහු වැඩිදුරටත් පවසති.
නමුත් අයිසීසී හි මෙම තීරණය යුදෙව් විරෝධී ලෙස නෙතන්යාහු හෙළා දැක තිබේ.
ගෝලීය අධිකරණයක් වන ICC ආයතනයට ජන සංහාරය, මනුෂ්‍යත්වයට එරෙහි අපරාධ සහ යුද අපරාධ සම්බන්ධයෙන් චෝදනා ලැබූවන්ට නඩු පැවරීමේ බලය ඇත.
හංගේරියාව සාමාජික රටවල් 125 ක් ඇතුළත් ICC හි ආරම්භක සාමාජිකයෙකු වන අතර එයින් ඉවත් වන පළමු යුරෝපීය සංගමයේ රට වනු ඇත.
සඳුනි තිලකරත්න