ටිබෙටයේ භූමිකම්පාවෙන් මියගිය ගණන 95 දක්වා ඉහළට

අද (07) අළුයම චීනයේ කඳුකර ටිබෙට් ප්‍රදේශයේ ඇති වූ ප්‍රබල භූමිකම්පාවෙන් අවම වශයෙන් පුද්ගලයින් 95 දෙනෙකු මියගොස් ඇති බව චීන රාජ්‍ය මාධ්‍ය වාර්තා කරනවා.

එමෙන්ම තවත් පුද්ගලයින් 130 දෙනෙකු පමණ තුවාල ලබා ඇති බවත් සඳහන්.

ටිබෙටයේ ශුද්ධ වූ ෂිගාට්සේ (Shigatse) නගරයට බලපෑ භූමිකම්පාව රිච්ටර් පරිමාණයේ 7.1 ක් සහ කිලෝමීටර 10 ක් ගැඹුරකින් යුක්ත වූ එකක් බවයි එක්සත් ජනපද භූ විද්‍යා සමීක්ෂණ දත්ත මඟින් තහවුරු කර තිබුණේ.

එමෙන්ම එය පසු කම්පන මාලාවකින් ද යුක්ත වූ බව සඳහන්.

මෙහි බලපෑම අසල්වැසි නේපාලයට සහ ඉන්දියාවේ ඇතැම් ප්‍රදේශවලට ද දැනී තිබුණු නමුත් නේපාල‍යෙන් කිසිදු දේපළ හෝ ජීවිත හානියක් වාර්තා වී නොමැත.

විදෙස් වාර්තා පෙන්වා දෙන්නේ මෙම භූමිකම්පාව මෑත වසරවලදී චීනය අත්දුටු මාරාන්තිකම ඛේදවාචකය වන බවයි.