‘කෙසෙල්වත්තේ ඉන්දික’ ගේ ගෝලයෙක් කෝටි ගාණක මත්ද්‍රව්‍ය සමග STF දැලේ
‘කෙසෙල්වත්තේ ඉන්දික’ නමැති ප්‍රබල මත්ද්‍රව්‍ය ජාවාරම්කරුගේ ගෝලයෙකු, විශාල මත්ද්‍රව්‍ය තොගයක් සහ ආයුධ සමග අත්අඩංගුවට ගෙන තිබෙනවා.
රුපියල් කෝටි එකහමාරකට ආසන්න වටිනාකමකින් යුක්ත ඈෂ්, කුෂ්, මැන්ඩි, මත්පෙති, මත් මුද්දර තොගයක් සහ වායු පිස්තෝලයක්, තියුණු කඩු දෙකක් සමග සැකකරු, මෙලෙස අත්අඩංගුවට ගෙන ඇත්තේ පොලිස් විශේෂ කාර්ය බලකාය විසින්.
‘කෙසෙල්වත්තේ ඉන්දික’ නමැති ප්‍රබල මත්ද්‍රව්‍ය ජාවාරම්කරු කොළඹ මැගසින් බන්ධනාගාරයේ සිට මත්ද්‍රව්‍ය ජාවාරම මෙහෙයවනු ලබන බවයි වාර්තා වන්නේ.
ඒ අනුව ඔහුගේ මත්ද්‍රව්‍ය බෙදාහරින ගෝලයෙකු මෙලෙස අත්අඩංගුවට ගෙන ඇති අතර, අදාළ සැකකරු 29 වන වියේ පසුවන දෙහිවල ප්‍රදේශයේ පදිංචිකරුවෙකු වනවා.
සැකකරු සමග ඈෂ් මත්ද්‍රව්‍ය කිලෝ 03යි ග්‍රෑම් 349ක්, කුෂ් මත්ද්‍රව්‍ය ග්‍රෑම් 25ක්, මැන්ඩි මත්ද්‍රව්‍ය ග්‍රෑම් 30ක්, මත්පෙති 320ක්, මත් මුද්දර 129ක්, වායු පිස්තෝල අවියක්, කඩු 02ක් හා මත්ද්‍රව්‍ය ඇසුරුම් කිරීමට යොදාගන්නා උපකරණ හා කාර් රථයක් අත්අඩංගුවට එහිදී පොලිස් විශේෂ කාර්ය බලකා භාරයට ගෙන ඇති අතර ඒවා වැඩිදුර විමර්ශන කටයුතු සඳහා ගල්කිස්ස පොලිස් ස්ථානය වෙත භාර දීමටයි පියවර ගෙන ඇත්තේ.