පාලි හා සංස්කෘත අන්තර්ජාතික භික්ෂු හුවමාරු වැඩසටහන සාර්ථකව නිමා වෙයි

බෞද්ධ දර්ශනයේ ප්‍රගතිශීලී ගමන්මඟ ශක්තිමත් කිරීම උදෙසා ශුද්ධෝත්තම දලයි ලාමා වහන්සේගේ මඟපෙන්වීම යටතේ 2022 වර්ශයේ බුද්ධගයාවේදී පාලි හා ස‍ංස්කෘත අන්තර්ජාතික භික්ෂු හුවමාරු වැඩසටහන ආරම්භ වූයේ මෙම සම්ප්‍රදායයන් අතර අන්‍යෝන්‍ය අවබෝධය වැඩිදියුණු කිරීමේ අරමුණින්.

ඒ අනුව මෙම වැඩසටහනේ තෙවන අදියර 2024 දෙසැම්බර් 21 දින ඉන්දියාවේ දී ආරම්භ වුණා.

එම වැඩසටහන සඳහා ශ්‍රී ලංකාව, ඉන්දියාව, ටිබෙටය, තායිලන්තය, දකුණු කොරියාව, වියට්නාමය, භූතානය යන රටවලින් භික්ෂූන් වහන්සේලා සහභාගී වූ අතර මේ සඳහා ශ්‍රී ලංකාව නියෝජනය කරමින් ත්‍රෛනිකායික භික්ෂූන්වහන්සේලා එකොලොස් නමක් සහභාගී වී තිබුණා.

මෙම වැඩසටහන බුද්ධත්වයේ දේශය වන බුද්ධගයාවේ දින 10ක වන්දනාවකින් ආරම්භ වීම විශේෂත්වයක්.

ගන්ඩෙන්, ඩ්‍රෙපුන්, සේරා යන බෞද්ධ අධ්‍යාපනික ආරාමික විශ්වවිද්‍යාලයයන්වල ජනවාරි 19 දක්වා දකුණු ඉන්දියාවේ අඛණ්ඩව පැවතුණා.

මෙම වැඩසටහනේ සමාප්තිය සනිටුහන් කරමින් ජනවාරි 20 වන දින ශුද්ධෝත්තම දලයි ලාමා වහන්සේ හමු වී උන්වහන්සේගේ ආශිර්වාදය ලබගත් භික්ෂූන්වහන්සේලා අද දින දිවයිනට පැමිණියා.

එම භික්ෂූන් වහන්සේලා නැවතත් සුරක්ෂිතව ලංකාවට රැගෙන ඒම සඳහා බෞද්ධ සහෝදරත්ව පදනමේ නිර්මාතෘ සභාපති, අන්තර්ජාතික බෞද්ධ මහා සම්මේලනයේ නියෝජ්‍ය මහලේකම් ආචාර්ය දමෙන්ද පෝරගේ මහතා ඊයේ රාත්‍රියේ ඉන්දියාව බලා පිටත් වුණා.

පාලි හා ස‍ංස්කෘත අන්තර්ජාතික භික්ෂු හුවමාරු වැඩසටහන සාර්ථකව නිමා කරමින් ලංකාවට පැමිණි ත්‍රෛනිකායික භික්ෂූන්වහන්සේලා පිළිගැනීම සඳහා පාලි හා සංස්කෘත සංස්කෘතික හුවමාරු මධ්‍යස්ථානයේ ලේඛකාධිකාරී ආචාර්ය ශර්මිලා මිල්‍ රෝයි මහත්මිය ඇතුළු කාර්ය මණ්ඩලය කටුනායක අන්තර්ජාතික ගුවන්තොටුපළ පරිශ්‍රයේ දී උණුසුම් පිලිගැනීමක් සිදු කරනු ලැබුවා.

මෙම වැඩසටහනේ ශ්‍ රීලංකාවේ වැඩසටහන වෙනුවෙන් පාලි හා සංස්කෘත සම්ප්‍රදායයන් නියෝජනය කරමින් විදෙස් භික්ෂූන් වහන්සේලා තිස්පස් දෙනෙකු පෙබරවාරි මස 01 දින සිට දින 15ක කාලයක් ලංකාවට පැමිණීමට නියමිතයි.

අනතුරුව උන්වහන්සේලා තායිලන්තයේ වැඩසටහන සඳහා පෙබරවාරි 16 දින සිට සම්බන්ධ වීමට ද නියමිතව තිබෙනවා.

ඡායාරූප👇🏻