ආපදා මරණ සඳහා වන වන්දි මුදල, රුපියල් මිලියනයක් දක්වා ඉහළ නැංවීමට රජයේ අනුමැතිය
ජනාධිපතිතුමාගේ සහ රජයේ උපදෙස් පරිදි ආපදා සහන සේවා වෙනුවෙන් රුපියල් මිලියන 30ක මුදල් ප්‍රතිපාදන වෙන්කොට ඇති බව ආරක්‍ෂක අමාත්‍යංශය නිවේදනය කර තිබෙනවා.
ඒ අනුව ආපදා හේතුවෙන් සිදුවන ජීවිත හානි වෙනුවෙන් මෙතෙක් ගෙවනු ලැබූ රුපියල් 250,000ක වන්දි මුදල රුපියල් මිලියනයක් දක්වා ඉහළ නැංවීමට රජයේ අනුමැතිය හිමි වී ඇති බවයි එම නිවේදනයේ සඳහන් වන්නේ.
එමෙන්ම අවතැන් වූ ජනතාව වෙනුවෙන් එක් පුද්ගලයෙකුට රුපියල් 1800ක් හා පවුල්වල සාමාජික සංඛ්‍යාව වැඩි වන අනුපිළිවෙලට රුපියල් 1800 සිට රුපියල් 2400, රුපියල් 2800, රුපියල් 3200 හා රුපියල් 3600 බැගින් වන පරිදි පිසූ ආහාර හෝ වියලි සලාක ලබාදීම සඳහා දෛනික ආහාර සලාක දීමනාවක් ලබාදීමට ද කටයුතු යොදා ඇති බවත් සඳහන්.
ආරක්‍ෂක අමාත්‍යංශය මෙම නිවේදනය නිකුත් කර තිබුණේ, නියෝජ්‍ය ආරක්‍ෂක අමාත්‍ය මේජර් ජෙනරල් අරුණ ජයසේකර (විශ්‍රාමික) මහතා විසින්, ‘මේ දිනවල දිවයිනට බලපා ඇති අයහපත් කාලගුණය හේතුවෙන් ඇති වී තිබෙන ආපදා තත්ත්වය පිළිබඳ ජනතාව දැනුවත් කිරීමේ අරමුණින්’ ඊයේ (ජන.21) කොළඹ ආපදා කළමනාකරණ මධ්‍යස්ථානයේදී පැවති විශේෂ මාධ්‍ය සාකච්ඡාවෙ හි දක්වන ලද අදහස්වලට අනුවයි.
එහිදී අදහස් දක්වමින් නියෝජ්‍ය අමාත්‍යවරයා ප්‍රකාශ කළේ, දැනට ලැබී ඇති සංඛ්‍යා ලේඛනවලට අනුව දිස්ත්‍රික්ක 18 ක ප්‍රාදේශීය ලේකම් කොට්ඨාශ 127 ක පවුල් 5821 කට අයත් පුද්ගලයන් 19032ක් ආපදා තත්ත්වය හේතුවෙන් අවතැන් වී ඇති බවයි.
මේ වනවිට ඔවුන් ආපදා සහන මධ්‍යස්ථාන 17 ක රඳවා සිටින අතර, ඔවුන්ට අවශ්‍ය යටිතල පහසුකම් මෙන්ම වියළි හා පිසූ ආහාර සලාක ලබාදීමේ කටයුතු මේ වනවිටත් අඛණ්ඩව ක්‍රියාත්මක වෙමින් පවතින බව සඳහන්.
එමෙන්ම ආපදා හේතුවෙන් පුද්ගල මරණ 2ක් වාර්තා වී ඇති අතර, පූර්ණ නිවාස හානි 10ක්, සුළු හෝ අර්ධ නිවාස හානි 438ක් මෙන්ම සුළු හෝ මධ්‍ය පරිමාණ ව්‍යාපාර හානි 25ක් වශයෙන් වාර්තා වී ඇති බවයි වැඩිදුරටත් සඳහන් වූයේ.
ජනාධිපතිතුමාගේ උපදෙස් පරිදි ආපදා කළමනාකරණ මධ්‍යස්ථානය, ජාතික ආපදා සහන සේවා මධ්‍යස්ථානය, ජාතික ගොඩනැගිලි පර්යේෂණ ආයතනය, කාලගුණ විද්‍යා දෙපාර්තමේන්තුව, ආරක්‍ෂක අමාත්‍යංශය යන ආයතනවල පූර්ණ අධීක්‍ෂණය යටතේ ආපදාවන්ට ලක් වී ඇති ප්‍රදේශවල දිස්ත්‍රික් ලේකම්වරුන්, ප්‍රාදේශීය ලේකම්වරුන්, සියලු රාජ්‍ය නිලධාරීන්, ත්‍රිවිධ හමුදාව, ශ්‍රී ලංකා පොලීසිය, සිවිල් ආරක්‍ෂක බලකාය හා අනෙකුත් සහන සේවා කණ්ඩායම් එක්ව පීඩාවට පත් ජනතාව වෙනුවෙන් පැය 24 පුරා ක්‍රියාත්මක සහන සැලසීමේ කටයුතු මේ වනවිටත් අඛණ්ඩව ක්‍රියාත්මක කරමින් පවතියි.
තවද එම ප්‍රදේශවල වැව් හා වාරිමාර්ග බොහොමයක් තවමත් පිටාර මට්ටමේ ඇති බැවින් වාරිමාර්ග ඉංජිනේරුවන්ගේ උපදෙස් පරිදි අවදානම් සහිත වැව් බැමි ශක්තිමත් කිරීමේ කටයුතු ද සිදු කරනු ලබයි.
මේ අතර කාලගුණ විද්‍යා දෙපාර්තමේන්තුවේ අනාවැකිවලට අනුව මෙම අයහපත් කාලගුණික තත්ත්වය ඉදිරියේදී පහව යනු ඇති බව ද නියෝජ්‍ය අමාත්‍යවරයා සඳහන් කළා.
මෙම තත්ත්වය පිළිබඳ සිදුකළ පුරෝකථන ඔස්සේ මාධ්‍ය හා සමාජ මාධ්‍ය හරහා සිදු කළ දැනුවත් කිරීම් මගින් නායයෑම් අවදානම් හා ගංවතුර හේතුවෙන් සිදු වීමට තිබූ හානි අවම කර ගැනීමට හැකි වූ බව සඳහන් කල නියෝජ්‍ය අමාත්‍යවරයා ඒ වෙනුවෙන් මාධ්‍ය ආයතනවලට සහ එම උපදෙස්වලට අනුගතව ක්‍රියා කළ ජනතාවට සිය ස්තූතිය ද පුදකර සිටියා.
අවදානමට පෙර සූදානම ඇති කිරීමේ රාජ්‍ය යාන්ත්‍රණය මේ වන විටත් සකස් කෙරෙමින් පවතින බවත්, එම ක්‍රියාවලිය සාර්ථකව ක්‍රියාත්මක කිරීම වෙනුවෙන් සියලු රාජ්‍ය ආයතන ඇතුළු ආපදා සහන කණ්ඩායම්වලට විශාල වගකීමක් පැවරී ඇති බවත්, රජයේ උපදෙස් හා නිවේදනවලට අනුගත වෙමින් සිදුවිය හැකි හානි අවම කරගැනීමට සහාය වීමට ජනතාව තවදුරටත් කටයුතු කළ යුතු බව ද නියෝජ්‍ය අමාත්‍යවරයා එහිදී අවධාරණය කළා.
මෙම මාධ්‍ය සාකච්ඡාවට ආරක්‍ෂක ලේකම්වරයා, කාලගුණ විද්‍යා දෙපාර්තමේන්තුවේ අධ්‍යක්‍ෂ ජනරාල්, ආපදා කළමනාකරණ මධ්‍යස්ථානයේ නිලධාරීන්, ජාතික ආපදා සහන සේවා මධ්‍යස්ථානයේ නිලධාරීන්, ජාතික ගොඩනැගිලි පර්යේෂණ ආයතනයේ නිලධාරීන්, කාලගුණ විද්‍යා දෙපාර්තමේන්තුවේ නිලධාරීන්, ආරක්‍ෂක අමාත්‍යාංශයේ නිලධාරීන්, ත්‍රිවිධ හමුදා ජ්‍යෙෂ්ඨ නිලධාරීන් සහ මාධ්‍යවේදීන් ඇතුළු පිරිසක් සහභාගිව සිටියා.