‘Clean Sri Lanka’ වැඩසටහන අද ඇරඹේ
“ක්ලීන් ශ්‍රී ලංකා” වැඩසටන එළිදැක්වීමේ ජාතික උත්සවය අද (01) පෙරවරු 9.00ට පැවැත්වීමට නියමිතව තිබෙනවා.
ඒ, ජනාධිපති අනුර කුමාර දිසානායක මහතාගේ ප්‍රධානත්වයෙන්.
ඊට සමගාමීව සිය සේවා ස්ථානවල රාජකාරි කටයුතු ආරම්භ කිරීමේ නිල උත්සවය පැවැත්විය යුතු බවයි, රාජ්‍ය පරිපාලන, පළාත් සභා සහ පළාත් පාලන අමාත්‍යංශය දැනුම්දී ඇත්‌තේ.
අද දින එහිදී ක්ලීන් ශ්‍රී ලංකා වෙබ් අඩවිය ද එළිදැක්වීමට නියමිතයි. විනයවත් රටක් ගොඩනැගීම සඳහා සෑම අංශයක්ම ආවරණය වන පරිදි ක්ලීන් ශ්‍රී ලංකා වැඩපිළිවෙළ ක්‍රියාත්මක කෙරෙනවා.
මෙය ක්‍රියාත්මක කිරීම සඳහා ජනාධිපති අනුර කුමාර දිසානායක මහතා විසින් සාමාජිකයින් 18 දෙනෙකුගෙන් යුත් කාර්ය සාධක බලකායක් ද පත් කරනු ලැබුවා.
මේ අතර ක්ලීන් ශ්‍රී ලංකා පුරවැසි ප්‍රතිඥාවක් ද නිකුත් කර තිබෙනවා.
