වෙඩි තබා මනුෂ්‍ය ඝාතනයකට තැත් කළ සැකකරුවෙකු අත්අඩංගුවට
මරදාන පොලිස් වසමේ මාලිගාකන්ද අධිකරණය අසළදී වෙඩි තබා කාන්තාවක් ඝාතනය කිරීමට තැත් කිරීම සම්බන්ධයෙන් සැකකරුවෙකු අත්අඩංගුවට ගෙන තිබෙනවා.
ඒ, කොළඹ අපරාධ කොට්ඨාශය මගින් ග්‍රෑන්ඩ්පාස් පොලිස් වසමේ මයිකල් පෙරේරා මාවතේදී යි.
එලෙස අත්අඩංගුවට ගෙන ඇත්තේ 35 හැවිරිදි කොළඹ 14 ප්‍රදේශයේ පදිංචිකරුවෙක්.
අදාළ වෙඩි තැබීම සඳහා පැමිණි යතුරුපැදිය පැදවූ සැකකරු මෙලෙස අත්අඩංගුවට ගෙන ඇති අතර ඔහුව අත්අඩංගුවට ගෙන ඇත්තේ අයිස් මත්ද්‍රව්‍ය සමගයි.
එම අවස්ථාවේදී ඔහු සන්තකයේ අයිස් මත්ද්‍රව්‍ය ග්‍රෑම් 16යි මිලිග්‍රෑම් 550ක් හා ජංගම දුරකථනයක් තිබී පොලිස් අපරාධ කොට්ඨාශය භාරයට ගෙන තිබෙනවා.
මෙම වෙඩි තැබීම සම්බන්ධයෙන් පසුගියදා (20) සැකකරුවන් තිදෙනෙකු සහ සැකකාරියක් අත්අඩංගුවට ගෙන තිබුණා.
සිද්ධිය සම්බන්ධයෙන් කොළඹ අපරාධ කොට්ඨාසය විසින් වැඩිදුර විමර්ශන ක්‍රියාත්මකයි.