කොළඹ – මීගමුව මාර්ගය භාවිත කරන අයට දැනුම්දීමක්

හෙට (14) රාත්‍රී 07.00 සිට මීගමුව – කොළඹ ප්‍රධාන මාර්ගයේ රථ වාහන තදබදයක් ඇති විය හැකි බවට පොලිසිය එම මාර්ගය භාවිත කරන රියදුරන්ට දැනුම් දෙනු ලබනවා.

ඒ, හැඳල පුරාණ රජමහා විහාරස්ථානයේ ශ්‍රී සම්බුද්ධ ජයන්ති පෙරහර හෙට රාත්‍රි 07 සිට අනිද්දා (15) අලුයම් කාලය දක්වා විථි සංචාරය කිරීමට නියමිත බැවින්.

ඒ හේතුවෙන් රියදුරන්ට විකල්ප මාර්ග භාවිත කරන ලෙසටයි, පොලිසිය ඉල්ලීමක් කළේ.

මෙම පෙරහැර විහාරස්ථානයෙන් ආරම්භ කර හැඳල මාර්ගය ඔස්සේ හැඳල හන්දිය දක්වා ගමන් කරනු ඇති.

ඉන් අනතුරුව කොළඹ – මීගමුව මාර්ගය හරහා ගොස් පරණ මීගමුව මාර්ගයේ ගමන් කර නැවත කොළඹ මීගමුව ප්‍රධාන මාර්ගයට පිවිස අල්විස් ටවුන්, හැඳල හන්දිය ඔස්සේ නැවත විහාරස්ථානයට පැමිණීමට නියමිත බව සඳහන්.