මට ඕනෙ ඉරාන තෙල් – ඩොනල්ඩ් ට්රම්ප් – නමුත් අමෙරිකානුවන් යුද්ධයට කැමති නෑ…
පසුගිය සඳුදා ජනාධිපති ඩොනල්ඩ් ට්රම්ප් ප්රකාශ කළේ තමා ඉරානයේ තෙල් “ලබා ගැනීමට” (take) කැමති වුවත්, ඇමරිකානු ජනතාවට යුද්ධය අවසන් වනු දැකීමට අවශ්ය බැවින් තවමත් එසේ නොකළ බවයි. ධවල මන්දිරයේ වාර්ෂික පාස්කු බිත්තර පෙරළීමේ (Easter egg roll) උත්සවය අතරතුර මාධ්යවේදීන් අමතමින් ඔහු මෙසේ පැවසීය.
“මගේ කැමැත්ත තිබුණා නම්, මම තෙල් ටික තබා ගන්නවා. නමුත් මට අපේ රටේ මිනිසුන්ව සතුටු කරන්නත් අවශ්යයි,” ට්රම්ප් පැවසීය.
“අවාසනාවකට ඇමරිකානු ජනතාව කැමතියි අපේ සෙබළුන් නැවත මෙරටට එනවා දකින්න. මට අවශ්ය විදිහට වුණා නම්, මම තෙල් ලබා ගන්නවා, ඒවා තබා ගන්නවා, ඒකෙන් විශාල මුදලක් ලැබෙනවා. ඒ වගේම මම ඉරානයේ ජනතාව ගැන දැන් ඔවුන්ව බලාගන්නවාට වඩා හොඳින් බලාගන්නවා,” යැයි ඔහු වැඩිදුරටත් පැවසීය.
එමෙන්ම යුද්ධයට සහය නොදක්වන ඇමරිකානුවන් “මෝඩයන්” ලෙසද ඔහු හැඳින්වීය. පසුගිය සතියේ නිකුත් වූ Reuters/Ipsos මත විමසුමකට අනුව, ඇමරිකානුවන් සිව්දෙනෙකුගෙන් තිදෙනෙකුම ඉරානයට ගොඩබිම් හමුදා යෙදවීමට විරුද්ධය. සමීක්ෂණයට ලක් වූවන්ගෙන් අඩකට වඩා ප්රකාශ කළේ ඉරාන යුද්ධය තමන්ගේ මූල්ය තත්ත්වයට බලපානු ඇති බවයි.
දැනට සති හයක් තිස්සේ පවතින මෙම යුද්ධය තමන් මෙහෙයවන ආකාරය ආරක්ෂා කරමින් ජනාධිපතිවරයා පැවසුවේ, “මතක තබා ගන්න, යුද්ධ වසර ගණනාවක් පවතිනවා. අපි එහි රැඳී සිටියේ දින 34ක් පමණයි. අපි දින 34කින් ඉතා ප්රබල රටක් විනාශ කළා,” යනුවෙනි.
ඉරානය හෝමුස් සමුද්ර සන්ධිය (Strait of Hormuz) නැවත විවෘත කිරීමට පියවර නොගතහොත් එරට සිවිල් යටිතල පහසුකම්වලට පහර දෙන බවට ඔහු නැවතත් තර්ජනය කළේය. ඒ සඳහා ඔහු ලබා දී ඇති නවතම කාලසීමාව අඟහරුවාදා සවසින් අවසන් වේ.
“ඔවුන්ට පරාජය පිළිගැනීමට අවශ්ය නැහැ. නමුත් ඔවුන්ට සිදු වේවි. එසේ නොකළහොත් ඔවුන්ට පාලම්, විදුලි බලාගාර හෝ වෙනත් කිසිවක් ඉතිරි වන්නේ නැහැ,” ඔහු අනතුරු ඇඟවීය. සිවිල් විදුලි බලාගාරවලට බෝම්බ හෙළීම යුද අපරාධයක් ලෙස සැලකීම පිළිබඳව තමා “කනස්සල්ලට පත් නොවන” බවද ඔහු පැවසීය.
“ඔබ දන්නවාද යුද අපරාධයක් කියන්නේ මොකක්ද කියලා? න්යෂ්ටික අවියක් ළඟ තබා ගැනීම. විකෘති නායකත්වයක් සහිත අසනීප රටකට න්යෂ්ටික අවියක් තබා ගැනීමට ඉඩ දීම – අන්න ඒකයි යුද අපරාධයක් වෙන්නේ,” යැයි ට්රම්ප් ප්රකාශ කළේය.