එජා මහ කොමසාරිස්වරයා ලබන 23වෙනිදා දිවයිනට
එක්සත් ජාතීන්ගේ මානව හිමිකම් පිළිබඳ මහ කොමසාරිස් වෝල්කර් ටර්ක් මහතා තෙදින නිල සංචාරයක් සඳහා ලබන 23න් වෙනිදා දිවයිනට පැමිණීමට නියමිතව තිබේ.
මානව හිමිකම් පිළිබඳ මහ කොමසාරිස්වරයෙක් දිවයිනට පැමිණෙන්නේ 2015 වසරෙන් පසුවයි.
පසුගිය වසරේ විදේශ කටයුතු අමාත්‍ය විජිත හේරත් මහතා ජිනීවාහිදී හමුවී සිදුකළ ආරාධනයකට අනුව කොමසාරිස්වරයා මෙරටට පැමිණීමට නියමිත බවට තොරතුරු වාර්තා වේ.
එම නිල සංචාරයේදී වෝල්කර් ටර්ක් මහතා ජනාධිපතිවරයා, අග්‍රාමාත්‍යවරිය, විදේශ කටයුතු අමාත්‍යවරයා, අධිකරණ කටයුතු අමාත්‍යවරයා ඇතුළු පාර්ශ්ව කිහිපයක් හමුවීමට නියමිතව තිබේ.
නිල සංචාරය අතරතුර මහ කොමසාරිස්වරයා මහනුවර, යාපනය, ත්‍රිකුණාමලය, ඇතුළු ප්‍රදේශ කිහිපයක සංචාරය කිරීමට සැලසුම් කර තිබේ.
මානව හිමිකම් පිළිබඳ මහ කොමසාරිස් වෝල්කර් ටර්ක් මහතා මෙරට සංචාරය අතරතුර, මානව හිමිකම් පිළිබඳ විශේෂ සැසිවාර කිහිපයකට සහභාගි වීමටද නියමිතයි.