ජාතික නිවාස සංවර්ධන අධිකාරියට වසර 46යි
ජාතික නිවාස සංවර්ධන අධිකාරිය පිහිටුවා ඊයේ (01) දිනට වසර 46ක් සපිරිණි.
ඒ, සඳහා ප්‍රධාන උත්සවය එම අධිකාරියේ ප්‍රධාන කාර්යාලයේදී පැවැත්වනු ලැබුවේ, එහි සභාපති අරවින්ද සිරිනාථ මහතාගේ ප්‍රධානත්වයෙන්ය.
ඊට සමගාමීව ප්‍රධාන කාර්යාල හා දිස්ත්‍රික් කාර්යාවලවල වැඩසටහන් රැසක් සංවිධාන කර තිබිණි.
මුලික මිනිස් අවශ්‍යතාවයක් වන මිනිස් වාසයට සුදුසු නිවහනක් ශ්‍රී ලාංකිකයින්ට උරුම කර දීම මුලික පරමාර්ථය කර ගනිමින් ජාතික නිවාස සංවර්ධන අධිකාරිය 1979 අප්‍රේල් මස 01 වන දින 1979 අංක 17 දරණ ජාතික නිවාස සංවර්ධන අධිකාරි පනත මගිනි මෙරට ස්ථාපිත කරන ලදී.
ජාතික නිවාස සංවර්ධන අධිකාරිය පිහිට වු දින සිට මේ දක්වාම එම අරමුණ ඉටු කරමින් ජාතික නිවාස අවශ්‍යතාවයෙන් විශාල කොටසක් සපුරාලමින් සිටී.
එදා මෙදා තුර වසර 46 ක කාල පරිච්ඡේදය තුළ පවුල් 1,795,155කට ජාතික නිවාස සංවර්ධන අධිකාරිය මඟින් නිවාස සිහිනය සැබෑ කරදී ඇත.
ජනතාවගේ නිවාස පිළිබඳ තිබු බලාපොරොත්තුව සැබෑවක් කර විධිමත් බවින් ඵලදායී සේවාවක් ලබාදීමටත්, ජාතික නිවාස සංවර්ධන අධිකාරියේ කාර්යාල සෑම දිස්ත්‍රික්කයටම ස්ථාපිත කර තිබේ.
යුද්ධයෙන් පීඩාවට පත් වු සහ නිවාස අහිමි වු, උතුරු පළාතේ පවුල් 2,557ක්, වවුනියාව දිස්ත්‍රික්කයේ බෝගස්වැව ප්‍රදේශයේ පවුල් 1,740ක්, මුලතිව් දිස්ත්‍රික්කයේ වැලිඔය ප්‍රාදේශීය ලේකම් කොට්ඨාසයේ පවුල් 1084ක් සහ මඩකලපුව දිස්ත්‍රික්කයේ පවුල් 1,000කගේ නිවාස ගැටලුව මෙන්ම ඉන් තුඩු දෙන සමාජ, ආර්ථික ගැටලු සමනය කිරීම සඳහා නිවාස ආධාර ව්‍යාපෘති නිර්මාණය විය.
වකුගඩු රෝගයෙන් පීඩාවට පත් වු රෝගී පවුල් 2049 ක ගේ නිවාස ගැටලුව විසඳමින් වකුගඩු රෝගීන්ගේ යහපැවැත්ම සඳහා ඉවහල් වන සෞඛ්‍ය සම්පන්න පරිසරය නිර්මාණය කරදීම සඳහා මෙම ව්‍යාපෘතිය දියත් කර ඇත.
නිවාස ඉදිකරගෙන ඇති නමුත් කපලාරුව නිම කර නිවසේ සෞඛ්‍ය ආරක්ෂිත පරිසරය සකස් කර ගැනීමට නොහැකි වු අඩු ආදායම්ලාභී සහ දිළිඳු පවුල් 110,267කගේ නිවාස ප්‍රමාණවත් මට්ටමින් සංවර්ධනය කිරීමට ජාතික නිවාස සංවර්ධන අධිකාරිය කටයුතු කර තිබේ.
ශ්‍රී ලාංකික මධ්‍යම පාන්තික ජනතාවගේ නිවාස ප්‍රශ්න විසඳීම වෙනුවෙන් ජාතික නිවාස සංවර්ධන අධිකාරිය පෞද්ගලික අංශය සමඟ එක්ව දැනටමත් වැඩසටහන් ගණනාවක් ක්‍රියාත්මක කර ඇත.
මේ යටතේ නිවාස ව්‍යාපෘති දෙකක් ජනතා සන්තකයට පත්කර ඇති අතර, දැනට වැඩ අවසන් කරමින් පවතින මධ්‍යම පාන්තික නිවාස යෝජනා ක්‍රමය වන වාද්දූව සීබ්‍රීස්, රාගම ලාවන්‍යා හයිට්ස් නිවාස ව්‍යාපෘති ද කඩිනමින් අවසන් කිරීම සඳහා මේ වනවිට මුලික කටයුතු සිදුකෙරේ.
දශක පහකට ආසන්න කාලයක් පුරාවට ම ජාතියේ නිවාස අවශ්‍යතාවය ඉටු කිරීම වෙනුවෙන් ගම, නගරය, මලෛයගම් (වතුකරය), ධීවර ක්ෂේත්‍රය, උතුරු නැගෙනහිර ප්‍රදේශ ඇතුළු දිවයිනේ සෑම දිස්ත්‍රික්කයකම විධිමත් නිවාස ගොඩනැංවීමේ ක්‍රියාවලියට උර දීමට ජාතික නිවාස සංවර්ධන අධිකාරිය කටයුතු කරමින් සිටී.