T 56 ගිනි අවියක් සමග නාවික හමුදා සෙබළෙක් අත්අඩංගුවට
T 56 ගිනි අවියක් සමග අතුරුදන් වූ නාවික හමුදා සෙබළෙකු නාරම්මල ප්‍රදේශයේදී අත්අඩංගුවට ගෙන තිබෙනවා.
එලෙස අත්අඩංගුවට ගෙන ඇත්තේ, ත්‍රිකුණාමලය ප්‍රදේශයේ නාවික හමුදා කඳවුරකට අනියුක්තව සේවය කරන නාවික හමුදා සෙබළෙක්.
සැකකාර නාවික හමුදා සෙබළා සිය කඳවුරේ සිට කොළඹට භාණ්ඩ රැගත් ලොරියකින් පැමිණෙමින් සිටියදී රාජකාරි ගිනි අවිය සහ උණ්ඩ 30 සහිත මැගසිනයක් ද සමග වරකාපොළ පොලිස් බල ප්‍රදේශයේදී ඊයේ (24) අතුරුදන් වූ බවයි පොලීසිය සඳහන් කළේ.
ලොරියේ රියැදුරා ලෙස කටයුතු කළ නාවික හමුදා සෙබළා සිය සහයක සෙබලා අතුරුදන්ව ඇති බවට පොලීසියට කළ පැමිණිල්ලක් අනුව විමර්ශන ආරම්භ කර තිබුණා.
සැකකාර සෙබළා බිරිඳ සමග ඇතිකර ගත් ආරවුලක් මත ඇය ඝාතනය කරන්නට ගිනි අවිය රැගෙන යන්නට ඇති බවටයි පොලීසිය සැක පළකරන්නේ.