ට්‍රම්ප්ගේ බද්දට සහනයක් ඉල්ලන ලක් රජය
අමෙරිකානු ජනාධිපති ඩොනල්ඩ් ට්‍රම්ප් විසින් ශ්‍රී ලංකාවෙන් ආනයනය කරන භාණ්ඩ සඳහා 44% ක තීරු බද්දක් පැනවීමට ගෙන ඇති තීරණය සම්බන්ධයෙන් ඉදිරියේ දී රාජ්‍යතාන්ත්‍රික මට්ටමෙින් කටයුතු කර එම බදු ප්‍රතිශතය අඩු කර ගැනීමට රජය තීරණය කර ඇති බව ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා පවසයි.
රජය වෙනුවෙන් මාධ්‍ය වෙත ප්‍රකාශයක් සිදුකරමින් අමාත්‍යවරයා පවසන්නේ මෙම බදු ප්‍රතිශතය තුළින් අපනයන ආදායම අඩුවිය හැකි බවයි.
නියෝජ්‍ය අමාත්‍යවරයා මෙසේද පැවසීය..
“දැන් අපි කළ යුතු වන්නේ මොකක්ද? අපි කළ යුතු වන්නේ මේ තත්ත්වය සැලකිල්ලට භාජනය කරමින් සාකච්ඡා පැවැත්වීම. දැනටමත් අපි සාකච්ඡා හුවමාරු කිරීමක් සිදුකරගෙන තිබෙනවා. මෙම තීරණය ක්‍රියාත්මක කරන්නේ අප්‍රේල් 9 වැනිදා සිට. ඊට කලින් අපි උත්සාහ කරනවා සාකච්ඡා මගින් බදු ප්‍රතිශතයේ අඩු කිරීමක් ඉඩකඩක් තියෙනවද කියල බලන්න.
අපේ රට මේ මොහොතේ සුවිශේෂි තත්ත්වයක තියෙන්නේ. ජාත්‍යන්තර මූල්‍ය අරමුදල සමග ගැටගැසුණු වැඩසටහනක් එක්ක ඉදිරියට යන්නේ. රටකට බැහැ තවත් රටකට ගිහිල්ලා ඒගොල්ලෝ ප්‍රතිපත්ති ක්‍රියාත්මක කරන්න කලින් අපිට බලපෑම් කරන්න. දැන් ඒ ප්‍රතිපත්තියෙන් අහිතකර බලපෑමක් එනවනම් අපි සාකච්ඡා කරලා යම් තැනකට එන්න ඕන. විය හැකි අහිතකර බලපෑම් තමයි ඇඟලුම් ආහාර වැනි විශේෂ අපනයන ද්‍රව්‍ය සම්බන්ධයෙන් බලපෑමක් වෙන්න පුළුවන්. ඒ කියන්නේ අපේ අපනයන වල මිල ගණන් ඉහළ යනවා.
ඇමරිකානු වෙළඳපොලේ තරගකාරීත්වය අඩු වෙන්න පුළුවන් මේ නිසා. ඒක නිසා ඉල්ලුම අඩු වෙලා අපේ අපනයන ආදායම අඩු වෙන්න පුළුවන්. මේ ගැන අපි ඉදිරියේදී සාකච්ඡා කරනවා. රාජ්‍ය ත්‍රාන්තික මට්ටමින් මට්ටමින් කතා කරනවා.”