දකුණු කොරියාවේ ජනාධිපති ධුරයෙන් නෙරපයි

දකුණු කොරියානු ජනාධිපති යුන් සුක් යෝල් වහාම ක්‍රියාත්මක වන පරිදි ධුරයෙන් නෙරපා හැරීමට එරට ආණ්ඩුක්‍රම ව්‍යවස්ථා අධිකරණය අද (04) නියෝග කර තිබෙනවා.

ඒ අනුව ඉදිරිය‌ේදී ජනාධිපතිවරණය පැවැත්වීමට සිදු වනු ඇති බවයි විදෙස් මාධ්‍ය වාර්තාවල දැක්වෙන්නේ.

යුන් සුක් යෝල් ජනාධිපතිවරයා විසින්  හමුදා නීතිය පැනවීමට නියෝග කර මාස 4කට පසුව ඔහුව මෙම ධුරයෙන් ඉවත් කිරීමට පියවර ගෙන ඇති බව සඳහන්.

එරට ආණ්ඩුක්‍රම ව්‍යවස්ථාවට අනුව නව ජනාධිපතිවරයකු තෝරා පත්කර ගැනීම සඳහා දින 60ක් තුළ ජනාධිපතිවරණය පැවැත්විය යුතුයි.

64 හැවිරිදි යෝල් ජනාධිපති ධුරය සඳහා 2022 වසරේ තේරී පත්වීමට පෙර ඉතාමත් ප්‍රසිද්ධ රජයේ නීතිඥවරයෙක් ලෙස කටයුතු කළා.

ඔහු දේශපාලනයට 2021 වසරේදී පිවිසි අතර වසරක් තුළ දකුණු කොරියානු ජනාධිපති ධුරය සඳහාද තේරී පත් වුණා.