පෙබරවාරි 5 වැනිදා සිට 7 වැනිදා දක්වා පාර්ලිමේන්තුව රැස්වෙයි

පාර්ලිමේන්තුව එළැඹෙන පෙබරවාරි මස 5 වැනි බදාදා සිට 7 වැනි සිකුරාදා දක්වා රැස්වීමට නියමිත බව පාර්ලිමේන්තුවේ මහ ලේකම් කුෂානි රෝහණදීර මහත්මිය පවසනවා.

පසුගියදා (23) කථානායකවරයාගේ ප්‍රධානත්වයෙන් පැවති පාර්ලිමේන්තු කටයුතු පිළිබඳ කාරක සභා රැස්වීමේදී ‍එම සතියට අදාළ පාර්ලිමේන්තු කටයුතු තීරණය කර තිබෙනවා.

ඒ අනුව මස පෙබරවාරි 5 වැනි බදාදා පෙ.ව 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇති අතර පෙ.ව 10.00 – පෙ.ව 10.30 කාලය අග්‍රාමාත්‍යවරියගෙන් අසනු ලබන ප්‍රශ්න සඳහායි වෙන්කර ඇත්තේ. (ප්‍රශ්න 4ක්)

පෙ.ව 10.30 පෙ.ව 11.00 කාලය කාලය වාචික පිළිතුරු අපේක්ෂා කරන ප්‍රශ්න සඳහා (ප්‍රශ්න 5ක්) වෙන් කර තිබෙනවා.

පෙ.ව 11.00 – පෙ.ව 11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන්කර ඇති අතර පෙ.ව 11.30 – ප.ව 3.30 කාලය විදේශ විනිමය පනත යටතේ නියෝගයක් සහ ආනයන හා අපනයන (පාලන) පනත යටතේ රෙගුලාසි දෙකක් විවාදයට ගැනීමට නියමිතයි.

ප.ව 3.30 – ප.ව 5.30 කාලය ආණ්ඩු පාර්ශ්වය විසින් ගෙන එනු ලබන සභාව කල්තැබීමේ විවාදය පැවැත්වීමට නියමිතව තිබෙනවා.

පෙබරවාරි 6 වැනි බ්‍රහස්පතින්දා පෙ.ව 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර ඇති බවයි පාර්ලිමේන්තු මහ ලේකම්වරිය සඳහන් කළේ.

පෙ.ව 10.00 – පෙ.ව 11.00 කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර තිබෙනවා.

පෙ.ව 11.00 – 11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන්කර ඇති අතර අනතුරුව පෙ.ව 11.30 – ප.ව 5.00 කාලය බුද්ධිමය දේපළ පනත යටතේ රෙගුලාසි විවාදයට ගැනීමට නියමිතයි.

ප.ව 5.00 – ප.ව 5.30 දක්වා කාලය වෙන්කර ඇත්තේ, ආණ්ඩු පාර්ශ්වය හා විරුද්ධ පාර්ශ්වය විසින් සභාව කල් තබන අවස්ථාවේ ඉදිරිපත් කරනු ලබන ප්‍රශ්න දෙකක් සඳහා යි.

පෙබරවාරි 7 වැනිදා සිකුරාදා පෙ.ව 9.30 – පෙ.ව. 10.00 කාලය ස්ථාවර නියෝග 22හි 1 සිට 6 දක්වා සඳහන් පාර්ලිමේන්තු කටයුතු සඳහා වෙන්කර තිබෙනවා.

පෙ.ව 10.00 – පෙ.ව 11.00 කාලය වාචික පිළිතුරු අපේක්ෂා කරන ප්‍රශ්න සඳහා වෙන් කර ඇති අතර පෙ.ව 11.00 – 11.30 කාලය ස්ථාවර නියෝග 27(2) යටතේ ප්‍රශ්න සඳහා වෙන්කර ඇති බව සඳහන්.

අනතුරුව පෙ.ව 11.30 – ප.ව 5.00 කාලය පෞද්ගලික මන්ත්‍රී යෝජනා 06ක් විවාදයට ගැනීමට නියමිතව තිබෙනවා.

ඒ යටතේ හේෂා විතානගේ මහතා විසින් ඉදිරිපත් කළ වතු ආශ්‍රිතව පවතින මාර්ග රජයට පවරා ගැනීම පිළිබඳ පෞද්ගලික මන්ත්‍රී යෝජනාව, කිංස් නෙල්සන් මහතා විසින් ඉදිරිපත් කළ සමුපකාර සඳහා භාණ්ඩ මිලදී ගැනීමේ ක්‍රියාවලියට නිසි ප්‍රසම්පාදන වැඩසටහනක් සකස් කිරීම පිළිබඳ පෞද්ගලික මන්ත්‍රී යෝජනාව, රෝහණ බණ්ඩාර මහතා විසින් ඉදිරිපත් කළ රජය සතුව සහල් සංචිතයක් පවත්වාගෙන යාම සඳහා වැඩපිළිවෙලක් සකස් කිරීම පිළිබඳ පෞද්ගලික මන්ත්‍රී යෝජනාව, චමින්ද විජේසිරි මහතා විසින් ඉදිරිපත් කළ කම්කරු සුබසාධන නිලධාරීන් පත් කිරීම සඳහා නිසි ක්‍රමවේදයක් සකස් කිරීම පිළිබඳ පෞද්ගලික මන්ත්‍රී යෝජනාව, රවී කරුණානායක මහතා විසින් ඉදිරිපත් කළ ශ්‍රී ලංකා පාර්ලිමේන්තු මන්ත්‍රීවරුන්ගේ විශ්‍රාම වැටුප් යෝජනා ක්‍රමය අහෝසි කිරීම පිළිබඳ පෞද්ගලික මන්ත්‍රී යෝජනාව සහ රවුෆ් හකීම් මහතා විසින් ඉදිරිපත් කළ කොවිඩ් – 19 වසංගතයෙන් මිය ගිය පුද්ගලයින්ගේ සිරුරු මිහිදන් කිරීමෙන් වැළකී ආදාහනය කිරීම සම්බන්ධයෙන් විමර්ශනය කොට සුදුසු නිර්දේශ ඉදිරිපත් කිරීම සඳහා පාර්ලිමේන්තු විශේෂ කාරක සභාවක් පත් කිරීම පිළිබඳ පෞද්ගලික මන්ත්‍රී යෝජනාව විවාදයට ගැනීමට නියමිතයි.

ඉන්පසු ප.ව. 5.00 සිට ප.ව. 5.30 දක්වා විරුද්ධ පාර්ශ්වය විසින් ගෙන එනු ලබන සභාව කල් තබන අවස්ථාවේ යෝජනාව විවාදයට ගැනීමට සැළසුම් කර තිබෙනවා.

තවද දැනට ශ්‍රේෂ්ඨාධිකරණය හමුවේ අභියෝගයට ලක්කොට ඇති පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පත සම්බන්ධයෙන් ශ්‍රේෂ්ඨාධිකරණ තීරණය 2025.02.05 වැනි දිනට ප්‍රථම කථානායකවරයා වෙත ලැබුණහොත් එම පනත් කෙටුම්පත පිළිබඳ දෙවන වර කියවීමේ විවාදයද 2025.02.06 වැනි දින පෙ.ව 11.30 සිට ප.ව 5.00 දක්වා එදිනට නියමිත වැඩකටයුතු සමග විවාදයට ගැනීමට කාරක සභාව තීරණය කර ඇති බව වැඩිදුරටත් සඳහන්.