25 වන යුද්ධ හමුදාධිපති ලෙස ලුතිනන් ජෙනරාල් ලසන්ත රොද්‍රිගො ආර්එස්පී පීඑස්සී අයිජී ධූරයේ වැඩ භාරගනී
ජනාධිපති අනුර කුමාර දිසානායක මහතා විසින් මේජර් ජෙනරාල් ලසන්ත රොද්‍රිගො ආර්එස්පී පීඑස්සී අයිජී, ලුතිනන් ජෙනරාල් නිලයට උසස් කර ශ්‍රී ලංකාවේ 25 වන යුද්ධ හමුදාධිපතිවරයා ලෙස පත් කරනු ලැබුවා.
ඊට අදාළ පත්වීම් ලිපිය ජනාධිපති ලේකම් ආචාර්ය නන්දික සනත් කුමානායක මහතා විසින් ජනාධිපති ලේකම් කාර්යාලයේ දී ඊයේ (30) භාර දුන්නා.
ඒ අනුව ලුතිනන් ජෙනරාල් ලසන්ත රොද්‍රිගො ආර්එස්පී පීඑස්සී අයිජී යුද්ධ හමුදාධිපති ලෙස, යුද්ධ හමුදා මූලස්ථානයේ දී අද (31) දින සර්ව ආගමික වතාවත් මධ්‍යයේ හමුදා සම්ප්‍රදායානුකූලව සිය ධූරයේ රාජකාරි භාර ගනු ලැබුවා.
යුද්ධ හමුදාධිපති ලුතිනන් ජෙනරාල් ලසන්ත රොද්‍රිගො වර්ෂ 1989 ජනවාරි මස 20 දින කෙඩෙට් නිලධාරි පාඨමාලා අංක – 31 යටතේ, යුද්ධ හමුදා නිත්‍ය බලකායට බැඳී එතුමන් දියතලාව ශ්‍රී ලංකා යුද්ධ හමුදා විද්‍යාපීඨය සහ ඉන්දියානු යුද්ධ හමුදා විද්‍යාපීඨය තුළින් මූලික පුහුණුව සාර්ථකව හැදෑරීමෙන් අනතුරුව දෙවන ලුතිනන් නිලයේ අධිකාරියට පත්ව ශ්‍රී ලංකා කාලතුවක්කු හමුදාව වෙත අනුයුක්ත කෙරුණා.
කොළඹ ශාන්ත බෙනඩික්ට් විද්‍යාලයේ කීර්තිමත් ආදි ශිෂ්‍යයෙකු වන එතුමන් පාසැල් වියේ දී අධ්‍යාපනික හා විෂය බාහිර ක්‍රියාකාරකම් දෙකෙහිම දස්කම් දැක්වූ ඔහු ජවසම්පන්න ක්‍රීඩකයෙකු වූ අතර අඛණ්ඩව වසර තුනක් විද්‍යාලයීය ශිෂ්‍ය නායකයෙකු ලෙස කටයුතු කර තිබෙනවා.
ඔහු පාසැලේ ක්‍රිකට්, පැසිපන්දු සහ රග්බි නායකත්වය දැරූ අතර පාසල් මලල ක්‍රීඩා කණ්ඩායමේ සාමාජිකයෙකු ද වුණා.
වසර 36 ක කීර්තිමත් හමුදා දිවිය තුළ දෙස් විදෙස් පාඨමාලා රැසක් හදාරා ඇති එතුමන් අණ හා මාණ්ඩලික සහ උපදේශක පත්වීම් ගණනාවක් හොබවා තිබෙනවා.