දිස්ත්‍රික්ක 5කට නායයෑම් අනතුරු ඇඟවීම්
ජාතික ගොඩනැගිලි පර්යේෂණ සංවිධානය විසින් දිස්ත්‍රික්ක 5කට නායයෑම් අනතුරු ඇඟවීම් නිකුත් කර තිබෙනවා.
ඊයේ (12) රාත්‍රී 8.30 සිට අද (13) රාත්‍රී 8.30 දක්වා වු පැය 24 සඳහා මෙම නිවේදනය වලංගු බව සඳහන්.
ඒ අනුව බදුල්ල දිස්ත්‍රික්කයේ වැලිමඩ, පස්සර , හාලිඇල , බදුල්ල ප්‍රදේශයට, මහනුවර දිස්ත්‍රික්කයේ මැදදුම්බර, පාතදුම්බර සහ උඩුදුම්බර ප්‍රදේශයට, කුරුණෑගල දිස්ත්‍රික්කයේ රිදීගම ප්‍රදේශයට, මාතලේ දිස්ත්‍රික්කයේ උකුවෙල සහ රත්තොට ප්‍රදේශයට, නුවරඑළිය දිස්ත්‍රික්කයේ වලපනේ සහ හගුරන්කෙත ප්‍රදේශයට, මෙම නායයෑම් අනතුරු ඇඟවීම් ක්‍රියාත්මකයි.
මේ අතර, ප්‍රධාන ජලාශ 73න් 27ක් මේ වන විට වාන් දමන මට්ටමට ළඟා වී ඇති බව වාරිමාර්ග දෙපාර්තමේන්තුව පවසනවා.
වාරි මාර්ග දෙපාර්තමේන්තුවේ ජල කළමනාකරණ අංශයේ අධ්‍යක්ෂ, ඉංජිනේරු පී.එස්.ඩී හේරත් මහතා සඳහන් කරන්නේ අනුරාධපුර දිස්ත්‍රික්කයේ ප්‍රධාන ජලාශ 10න් 07ක් මේ වන විට වාන් මට්ටමට ළඟා වී ඇති බවයි.
අම්පාරේ ප්‍රධාන ජලාශවලින් තුනක් පිටාර මට්ටමට ළඟා වී ඇති අතර, බදුල්ල දිස්ත්‍රික්කයේ ජලාශ 7න් 3ක් මේ වනවිට පිටාර මට්ටමට ළඟා වී ඇති බව සඳහන්.
මේ අතර මඩකලපුව දිස්ත්‍රික්කයේ ප්‍රධාන ජලාශ 4න් 3ක් මේ වනවිට පිටාර මට්ටමට ළඟාවී ඇති අතර, හම්බන්තොට ප්‍රධාන ජලාශ 10න් දෙකක් පිටාර මට්ටමට ළඟා වී තිබෙනවා.
ගාල්ල දිස්ත්‍රික්කයේ ප්‍රධාන ජලාශ දෙකෙන් එකක් පිටාර මට්ටමේ ඇති අතර, මහනුවර දිස්ත්‍රික්කයේ ප්‍රධාන ජලාශ 3න් 2ක් පිටාර මට්ටමට ළඟා වී ඇති අතර, කුරුණෑගල දිස්ත්‍රික්කයේ ජලාශ 10න් එක් ජලාශයක් සහ මොනරාගල දිස්ත්‍රික්කයේ ජලාශ 3න් දෙකක් වාන් දමමින් පවතින බව පී.එස්.ඩී හේරත් මහතා පවසනවා.
ජලාශ වාන් දමමින් පවතින එම ප්‍රදේශ ආශ්‍රිත පහත් බිම් වල ජනතාව අවධානයෙන් කටයුතු කළ යුතු බවටයි උපදෙස් ලබා දී ඇත්තේ.