අල කන්ටේනර් හතරක් අඩු ලංසුවකට ගෙන වැඩි මිලට විකුණලා

විදෙස්ගත පාතාල නායකයන් මෙහෙයවන සංවිධානාත්මක කණ්ඩායම්වල මැදිහත්වීමෙන් අල කන්ටේනර් හතරක් අඩු ලංසුවකට ටෙන්ඩරයෙන් ගෙන වැඩි මිලට වරාය තුළදීම විකුණා ඇති බව වරාය ආරංචි මාර්ග පවසනවා.

චීනයෙන් අර්තාපල් ආනයනය කළ පුද්ගලයන් මෙම කන්ටේනර නිදහස් නොකිරීම හේතුවෙන්, වරාය අධිකාරියෙන් අර්තාපල් කන්ටේනර් හතර සඳහා ටෙන්ඩර් කැඳවා තිබුණේ ජනවාරි 1 වැනිදායි.

මෙහිදී අතරමැදි ගැණුම්කරුවන් මැදිහත්වී අල කිලෝවකට රුපියල් 120ක අඩු ලංසුවක් තබා ටෙන්ඩරය ලබාගෙන ඇත්තේ දූෂිත නිලධාරීන් කිහිපදෙනකුගේද සහාය ඇතිව බවයි වරාය ආරංචි මාර්ග අනාවරණය කළේ.

මෙම සතියේ සතොස වෙළෙඳසැල්වල ආනයනික අර්තාපල් කිලෝවක තොග මිල රුපියල් 180ක්ද සිල්ලර මිල 210ක් වන අතරේ අඩු ලංසුවක් තබා මෙම කණ්ඩායම් විසින් ටෙන්ඩරය ලබාගෙන තිබෙනවා.

ඉන්පසුව සෙකන්ඩ් සේල් දමා වරායේදීම ව්‍යාපාරිකයන්ට වැඩි මිලකට විකුණා ඇති බවද සඳහන්.

පාතාල කල්ලිවල මැදිහත්වීමෙන් වරායේ සිදුකරන මෙවැනි දූෂිත ටෙන්ඩර් දිගින් දිගටම සිදුවීමෙන් රජයට ලැබෙන ආදායම් අහිමි වී යන බව සේවකයෝ පෙන්වා දෙනවා.

මෙම අල කන්ටේනර් හතර තුළ අල කිලෝ ලක්ෂයකට වැඩි ප්‍රමාණයක් තිබී ඇති අතර මෙය රාජ්‍ය ආයතන වෙත මිලදී ගන්නේ නම් පාරිභෝගිකයන්ට සහන මිලකට ලබාදීමටද ඉඩ තිබුණු බවද වාර්තා වනවා.

මෙම ටෙන්ඩරය පාතාල කණ්ඩායම්වල බලපෑම මත අඩුමිලකට ලංසු තැබීමෙන් රුපියල් ලක්ෂ හැටකට අධික මුදලක් රජයට අහිමි වී තිබෙනවා.