පෞද්ගලික බස් රියදුරන්ට සහ කොන්දොස්තරවරුන්ටත් සේවක අර්ථසාධක අරමුදල් !
පෞද්ගලික බස් රථ රියදුරන්, කොන්දොස්තරවරුන්, ත්‍රීරෝද රථ රියදුරන් සහ ඉලෙක්ට්‍රොනික යෙදවුම් හරහා ප්‍රවාහන ක්ෂේත්‍රය තුළ නියැලී සිටින්නන් (App Base Workers) වෙනුවෙන් සේවක අර්ථසාධක අරමුදලේ (EPF) සහ සේවා නියුක්තයන්ගේ භාර අරමුදලේ (ETF) දායකත්වය ලබා දීම ඇතුළු කරුණු කිහිපයක් පරීක්ෂා කිරීම සඳහා අමාත්‍යංශයීය උපදේශක කාරක සභාවට වගකියනු ලබන අනුකාරක සභාවක් පත් කර තිබේ.
මෙම පත් කිරීම සිදු කර ඇත්තේ, පසුගිය ජනවාරි 24 වැනි දින පැවැති ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභා රැස්වීමේදී ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා විසින්ය.
මෙම අනු කාරක සභාවේ සාමාජිකයෝ ලෙස චන්දන සූරියආරච්චි (සභාපති), ජගත් විතාන, දිනිඳු සමන් සහ දේවානන්ද සුරවීර යන මහත්වරු පත් ඇති බව පාර්ලිමේන්තු සන්නිවේදන දෙපාර්තමේන්තුව නිකුත් කළ නිවේදනයක සඳහන්ය.
එමෙන්ම අමාත්‍ය බිමල් රත්නායක මහතා විසින් තවත් අනුකාරක සභා දෙකක් පත් කර ඇත.
ප්‍රවාහන ක්ෂේත්‍රය හා සම්බන්ධ නීතීමය රාමුව ශක්තිමත් කිරීම, ඉදිරි වසර පහකින් පසුව ශ්‍රී ලංකාවේ ප්‍රවාහන ක්ෂේත්‍රයේ දිශානතිය කෙබඳු ද යන්න තීරණය කිරීම, ප්‍රවාහන මාධ්‍යයන් භාවිත කිරීමේදී කාන්තාවන් සහ ආබාධිත ප්‍රජාව මුහුණ දෙන ගැටලු කෙරෙහි විශේෂ අවධානය යොමු කිරීම සහ ප්‍රවාහන ක්ෂේත්‍රය දියුණු කිරීම සඳහා නෛතික සහ පරිපාලනමය යෝජනා ඉදිරිපත් කිරීම පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනෙවියගේ සභාපතීත්වයෙන් පිහිටුවා ඇති එම සභාවේ වගකීම වෙයි.
සුගත් වසන්ත ද සිල්වා, තනුර දිසානායක සහ සුජීව දිසානායක යන මහත්වරු එහි සෙසු සාමාජිකයන් ලෙස කටයුතු කරති.
තෙවැනි අනුකාරක සභාව ස්ථාපිත කර ඇත්තේ, ප්‍රවාහන කර්මාන්තය හා බැඳි අතිරේක සේවා නිර්මාණය කිරීම සඳහා ව්‍යාපෘති මාදිලි සැකසීම වෙනුවෙන් පිහිටුවා ඇත. මේ මගින් පවතින සම්පත් භාවිත කොට ප්‍රවාහන ක්ෂේත්‍රයෙහි මූලික අභිප්‍රායන් හා බැඳී පවතින අංශ දියුණු කිරීම සහ අතිරේක සේවා නිර්මාණය කොට එමගින් අමතර ආදායම් උත්පාදනය කිරීම සඳහා ව්‍යාපෘති මාදිලි සැකසිය යුතුය.
මෙම අනු කාරක සභාවේ සාමාජික සභාපති ලෙස පාර්ලිමේන්තු මන්ත්‍රී චතුරංග අබේසිංහ මහතා කටයුතු කරන අතර රවීන්ද්‍ර බණ්ඩාර සහ ධනුෂ්ක රංගනාත් යන මහත්වරු සෙසු සාමාජිකයෝ වෙති.