‘DAVID LYNCH’ ප්‍රත්‍යාවලෝකන සිනමා දැක්ම හෙට තරංගනී සිනමා ශාලාවේදී

අමෙරිකාවේ අතිවිශිෂ්ඨ චිත්‍රපට නිෂ්පාදකයෙක්, දෘශ්‍ය කලාකරුවෙක්, සංගීතඥයෙක් සහ නළුවෙක් වන ‘DAVID LYNCH’ වෙනුවෙන් ජාතික චිත්‍රපට සංස්ථාව විසින් ප්‍රත්‍යාවලෝක සිනමා දැක්මක් සිදුකිරීමට සැළසුම් කර තිබෙනවා.

ඒ අනුව හෙට (30) දින ජාතික චිත්‍රපට සංස්ථාවේ තරංගනී සිනමා ශාලාවේදී ‘DAVID LYNCH’ ගේ චිත්‍රපට ත්‍රිත්වයක් ප්‍රදර්ශනය කිරීමට නියමිතයි.

ඊට සමගාමීව අනිද්දා (31) දින සිනමා අධ්‍යාපන වැඩමුළුවක් ද පැවැත්වීමට සැළසුම් කර තිබෙනවා.

DAVID LYNCH නමැති නිර්මාණකරුවා “දූරදර්ශී” චරිතයක් ලෙස කලා ලෝකය තුළ ප්‍රකට අතර බොහෝ විට ඔහුගේ නිර්මාණ අධියථාර්ථවාදී සහ පර්යේෂණාත්මක ගුණාංගවලින් කැපී පෙනෙනවා.

දශක පහකට වැඩි කාලයක් පුරා දිවෙන ඔහුගේ වෘත්තීය ජීවිතය තුළ, ඇකඩමි සම්මාන ඇතුළු බොහෝ සම්මානයන් හිමිකරගැනීමට ඔහු සමත් වුණා.

එම අති විශිෂ්ඨ කලාකරුවාගේ දැවැන්ත නිර්මාණ ත්‍රිත්වයක් මෙලෙස ජාතික චිත්‍රපට සංස්ථාව විසින් හෙට දින ප්‍රදර්ශනය කිරීමට නියමිතයි.

ඒ අනුව හෙට (30) පෙරවරු 10.00ට Lost Highway (1997) චිත්‍රපටය, ප.ව 1.00ට Inland Empire (2006) චිත්‍රපටය සහ ප.ව 5.00ට Mulholland Drive (2001) යන චිත්‍රපට ත්‍රිත්වය එලෙස ප්‍රදර්ශනය කෙරෙනු ඇති.

ඊට සමගාමීව සිදුකෙරෙන සිනමා අධ්‍යාපන වැඩමුළුව අනිද්දා දින පෙ.ව 9.00ට ආරම්භ කිරීමට සැලසුම් කර තිබෙනවා.

සිනමාව පිළිබඳ ඇල්මක් ඇති ඔබටයි මේ ආරාධනාව..

ඒ සඳහා 31 වැනිදා පෙ.ව 9.00-10.00ත් අතර කාලසීමාව තුළ ඔබට ලියාපදිංචි විය හැකියි.

එම වැඩමුළුව එදින පෙ.ව 9.00 සිට ප.ව 6.00 දක්වා පැවැත්වීමට සැළසුම් කර තිබෙනවා.

ඇතුළුවීම නොමිලේ..

වැඩමුළුව සඳහා සම්පත් දායකත්වය :

බූඩි කීර්තිසේන.
භූපති නලීන්
චින්තන ධර්මදාස
විමුක්ති ජයසුන්දර
විදර්ශන කන්නංගර

සටහන : උමා තිලකරත්න