නවක වදය වැළැක්වීම සඳහා කාර්ය සාධක බලකායක්
අධ්‍යාපන, උසස් අධ්‍යාපන, වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරියගේ උපදෙස් මත විශ්වවිද්‍යාල පද්ධතියේ සහ අනෙකුත් උසස් අධ්‍යාපන ආයතන තුළ පවතින නවක වදය, හිංසනය හා සියලුම ආකාරයේ ප්‍රචණ්ඩත්වයන් වැලැක්වීම සඳහා වන ජාතික කාර්ය සාධක බලකායක් පත් කිරීමට අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශයේ ලේකම් නාලක කළුවැව මහතා විසින් කටයුතු කර තිබේ.
ලේකම්වරයා විසින් මෙම පත් කිරීම් සිදු කර ඇත්තේ 2025.05.14 වන දින ඉසුරුපාය අධ්‍යාපන අමාත්‍යාංශ පරිශ්‍රයේ දී පැවති සාකච්ඡාවේදී එළඹුණු තීරණවලට අනුවයි.
විශ්වවිද්‍යාල මෙන්ම අනෙකුත් උසස් අධ්‍යාපන ආයතන තුළ පවතින නවකවදය ඉන් තුරන් කිරීම වර්තමාන රජයේ ප්‍රමුඛ අරමුණකි.
නවකවදය පමණක් නොව ශිෂ්‍යන් වෙත ශිෂ්‍යන්ගෙන්, ආයතන පරිපාලනයෙන් හෝ වෙනත් පාර්ශව හරහා සිදුවන සියලුම ආකාරයේ හිංසනයන් මෙන්ම එම පාර්ශවවලින් ආචාර්යවරුන්ට සහ අනධ්‍යයන සේවකයින්ට සිදුවන හිංසනයන් ද නතර කිරීම එම කාර්ය සාධක බලකායේ අරමුණ වී තිබේ.
විශ්වවිද්‍යාල සහ අනෙකුත් උසස් අධ්‍යාපන ආයතන තුල අධ්‍යාපනයට උචිත නිදහස් පරිසරයක් පවත්වාගෙන යාම සඳහා එම සියලු ආකාරයේ හිංසනයන් සහ ප්‍රචණ්ඩත්වයන් නතර කිරීම අත්‍යාවශ්‍ය වේ.
මෙම කාර්ය සාධක බලකායේ සාමාජිකයින් ලෙස පහත සඳහන් නියෝජිතයින් පත්කර ඇත.
1. මහාචාර්ය කේ.එල්.වසන්ත මහතා – උප සභාපති, විශ්වවිද්‍යාල ප්‍රතිපාදන කොමිෂන් සභාව
2. මහාචාර්ය ප්‍රභා මනුරත්න මහත්මිය – අධ්‍යක්ෂ, ස්ත්‍රී පුරුෂ සමානාත්මතාවය හා සාධාරණත්වය සදහා වන මධ්‍යස්ථානය, (CGEE) විශ්වවිද්‍යාල ප්‍රතිපාදන කොමිෂන් සභාව
3. මහාචාර්ය හේමමාලි ගුණතිලක මහත්මිය -සාමාජික, විශ්වවිද්‍යාල ප්‍රතිපාදන කොමිෂන් සභාව
4. මහාචාර්ය විජය ජයතිලක මහතා – CGEE ආයතනයේ හිටපු සාමාජික
5. ආචාර්ය සයුරි පෙරේරා මහත්මිය – මනෝ චිකිත්සක අධ්‍යනාංශය,වෛද්‍ය පීඨය, පේරාදෙණිය විශ්ව විද්‍යාලය
6. ශානිකා මලල්ගොඩ මහත්මිය – ජාතික ළමාරක්ෂක අධිකාරිය
7. අප්සරා කල්දේරා මහත්මිය – අතිරේක ලේකම්, අධ්‍යාපන අමාත්‍යාංශයේ උසස් අධ්‍යාපන අංශය
8. ගුණදාස සමරසේකර මහතා – අතිරේක ලේකම්, අධ්‍යාපන අමාත්‍යාංශයේ වෘත්තීය අධ්‍යාපන අංශය
9. ආචාර්ය චින්තක පෙරේරා මහතා – අධ්‍යක්ෂ, බටංගල විශ්වවිද්‍යාල විද්‍යායතනය
10. ඒ.ජී.ඒ.ජාලිත කුමාර මහතා – අධ්‍යක්ෂ, ශ්‍රී ලංකා උසස් තාක්ෂණ ආයතනය-කොළඹ 15
11. ජේ.පී.විජයතිලක ජයසිංහ මහතා – කොළඹ විශ්වවිද්‍යාලය, විශ්ව විද්‍යාල අනධ්‍යන සේවක නියෝජනය
12. ඩබ්.ඒ.ඒ.වේරහැර මහතා – පේරාදෙණිය විශ්වවිද්‍යාලය, විශ්වවිද්‍යාල විනයාරක්ෂක අංශ නියෝජනය
13. කවිදු බිම්සර මහතා – ලේකම්, මහා ශිෂ්‍ය සංගමය, කොළඹ විශ්වවිද්‍යාලය. නීති පීඨ ශිෂ්‍ය.
14. සජිනි වත්සලා මෙනෙවිය – ලේක්ම්, මහා ශිෂ්‍ය සංගමය, මොරටුව විශ්වවිද්‍යාලය. නීති විද්‍යාල ශිෂ්‍ය.
15. පොලිස්පතිවරයා විසින් නම් කරන ලද නියෝජිතයකු
16. නීතිපතිවරයා විසින් නම් කරන ලද නියෝජිතයකු
මෙරට විශ්වවිද්‍යාල ඇතුලු උසස් අධ්‍යාපන ආයතන තුල ප්‍රචණ්ඩත්වයෙන් තොර වටපිටාවක් සහ සංස්කෘතියක් නිර්මාණය කිරීම, ඒ වෙනුවෙන් ප්‍රතිපත්තිමය යෝජනා සකස් කිරීම, ඊට අවශ්‍ය නීතිමය රාමු යාවත්කාලීන කිරීම සඳහා යෝජනා සකස්කිරීම, හිංසනය සහ ප්‍රචණ්ඩත්වය නතර කිරීම සඳහා යාන්ත්‍රණයක් නිර්මාණය කිරීම, සිදුවීම් වාර්තාකිරීමට සහ ඒවාට ඉක්මන් ප්‍රතිචාර දැක්වීමට අදාල ක්‍රමවේද සැකසීම, ඉහත අරමුණු වෙනුවෙන් රාජ්‍ය මෙන්ම රාජ්‍ය නොවන ආයතන සහ පුද්ගලයින් සම්බන්ධ කරගැනීම, වින්දිතයින්ගේ ආරක්ෂාව සහ ගෞරවය සුරැකීමට අවශ්‍ය ක්‍රියාමාර්ග ගැනීම, වින්දිතයින්ට සිදුවූ මානසික බලපෑම් සැලකිල්ලට ගනිමින් යථා තත්වයට පත්කරලීම සඳහා අවශ්‍ය කටයුතු වෙත යොමු කිරීම වැනි කාර්‍ය්යන් මෙම කාර්‍ය් සාධක බලකාය හරහා සිදුකිරීමට අපේක්ෂිතය.
සිදුවීම් සඳහා ප්‍රතිචාර දැක්වීමකට පමණක් සීමා නොවී හිංසනය සහ ප්‍රචණ්ඩත්වයෙන් තොර වටපිටාවක් උසස් අධ්‍යාපන ආයතන තුල නිර්මාණය කිරීම සඳහා අවශ්‍ය දැනුවත් කිරීම් ආදී වැඩසටහන් ජාතික වැඩපිළිවෙළකට අනුව සංවිධානය කිරීම වැනි කරණුද සැලකිල්ලට ගනිමින් ඉහත අරමුණු පෙලගස්වා ඇත.
ඉදිරියේදී මෙම කාර්ය සාධක බලකාය යටතේ විශ්වවිද්‍යාල මට්ටමින් සහ අනෙකුත් උසස් අධ්‍යාපන ආයතන මට්ටමින් ඒකක පිහිටුවීමට ද යෝජනා වී ඇත.