රත්මලානේ නිවසක ගින්නක්

රත්මලාන, ශ්‍රී ඥානේන්දර පාර දෙමහල් නිවසක උඩු මහලේ කාමරයක අද (02) දින අලුයම හදිසි ගින්නකින් හටගෙන තිබෙනවා.

ගින්නෙන් එහි දේපල සම්පූර්ණයෙන්ම විනාශවී ගොස් ඇතැයි දෙහිවල ගල්කිස්ස මහනගර සභා ගිනි නිවීම් සේවා දෙපාර්තමේන්තුවේ ස්ථානභාර නිලධාරී එල්. සුනන්ද පෙරේරා මහතා පැවසුවා.

අලුයම 3.00 ට පමණ මෙම ගින්න ඇතිවී තිබෙන අතර, ගිනි නිවීමේ රථ දෙකක් සමඟ ගිනි භටයින් නව දෙනෙකු සමග ගොස් ඉතා කුඩා අඩි තුනක පමණ පිවිසුම් මාර්ගයේ ගොස් දැඩි පරිශ්‍රමයක් දරා ඉහළ මහලේ පැතිර යමින් තිබූ ගින්න පාලනය කිරීමට සමත් වූ බව ඔහු සඳහන් කළා.

සිද්ධිය වන අවස්ථාවේ නිවැසියන් බිම් මහලේ නිදාගන සිට ඇති අතර, අවට නිවැසියන්ගේ කෑ ගැසීම් නිසා අවදිවී එළියට පැමිණ පොලීසිය දැනුවත් කර තිබෙනවා.

ගින්නට හේතුව හෝ සිදුවූ අලාභය ගණනය කර නැහැ.

සිද්ධිය සම්බන්ධයෙන් වැඩිදුර පරීක්ෂණ ගල්කිස්ස පොලීසිය විසින් සිදු කරනු ලබයි.