කෝටි ගණනක් වටිනා හෂීෂ් සහ කුෂ් තොගයක් මාට්ටු

රුපියල් තුන්කෝටි හැටහතර ලක්ෂ අසූ දහසක් වටිනා “හෂීෂ්” සහ “කුෂ්” මත්ද්‍රව්‍ය තොගයක් මෙරටට රැගෙන විත්, කටුනායක ගුවන් තොටුපොළෙන් පිට කර ගෙන යමින් සිටි විදේශිකයෙකු අද (21) දින දහවල් ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් විසින් අත් අඩංගුවට ගෙන තිබෙනවා.

මොහු උතුරු අයර්ලන්තයේ වාසය කරන 32 හැවිරිදි බ්‍රිතාන්‍ය ජාතිකයෙකු වන අතර ඔහු එරට කරාටේ සටන් ශිල්පය උගන්වන ගුරුවරයෙක්.

ඔහු අද දින දහවල් 11.06 ට තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා .

මොහු විසින් රැගෙන විත් තිබූ ගමන් මලු දෙකක් තුළ “හෂීෂ්” මත්ද්‍රව්‍ය කිලෝ ග්‍රෑම් 01යි ග්‍රෑම් 370ක් සහ ” කුෂ්” මත්ද්‍රව්‍ය ග්‍රෑම් 908ක් සගවා ගෙන සිටියදී පොලිස් මත්ද්‍රව්‍ය කාර්යාංශයේ නිලධාරීන් විසින් සොයා ගැණුනා.

මෙම පුද්ගලයා ලෝකයේ විවිධ රටවල සංචාරය කර ඇති පුද්ගලයෙකු බව ඔහුගේ ගමන් බලපත්‍රය ඇසුරෙන් සිදු කළ විමර්ශන වලදී අනාවරණය කර ගෙන තිබෙනවා .