කොළඹ විශ්වවිද්‍යාලයෙන් ශිෂ්‍ය පිරිසකට සිදු වූ අසාධාරණය
කොළඹ විශ්වවිද්‍යාලය මගින් පැවැත් වු ව්‍යාවසායකත්ව සහ කුඩා ව්‍යාපාර කළමනාකරණ උසස් ඩිප්ලෝමාව හැදෑරූ ශිෂ්‍ය පිරිසකට ලකුණු ලබාදීමේදී සිදු වූ අක්‍රමිකතාවක් නිසා ශිෂ්‍ය පිරිසකට බලවත් අසාධාරණයක් සිදු වී ඇති බැවින් ඒ පිළිබදව වහා සොයා බලා සාධාරණයක් ඉටු කරන ලෙස විශ්ව විද්‍යාල ප්‍රතිපාදන කොමිසන් සභාවට පැමිණිලි ලැබී තිබේ.
මෙම ඩිප්ලෝමාව සඳහා එක් ශිෂ්‍යයෙක්ගෙන් රුපියල් 140,000ක මුදලක් අය කරගෙන ඇති අතර පාඨමාලාව අතර තුර මෙහෙයුම් කළමනාකරණ විෂය ඉගැන්වීමට අදාල මතු වූ ගැටලුවක් මුල් කරගෙන ශිෂ්‍යයින් විසින් ඒ පිළිබදව කොළඹ විශ්ව විද්‍යාලයේ කළමනාකරණ සහ සංවිධාන අංශයට පැමිණිලි කර ඇත.
විෂයට අදාලව ලබාදී තිබූ මාර්ගෝපදේශවල සදහන් ලකුණු දීමේ ක්‍රමවේදය වෙනස් කර අවසන් විභාගයේ දී ලකුණු ලබාදීමට එක්තරා ආචාර්යවරියක් පියවර ගත්තේ පාඨමාලාව අතර තුර ශිෂ්‍ය පිරිසක් කළ පැමිණිල්ලට පළිගැනීමක් වශයෙන් යැයි විභාගය ලියූ ශිෂ්‍යයින් යළි කර ඇති පැමිණිල්ලෙන් පෙන්වා දී ඇත.
මේ අතර තෝරාගත් පිරිසකට විභායට එන ප්‍රශ්න පිළිබදව තොරතුරු ලබා දී පාඨමාලාව අතර තුර පැමිණිලි කළ ශිෂ්‍ය පිරිසකට අසාධාරණයක් කරමින් ප්‍රශ්න පත්‍ර වෙනස් කර ඇතැයි ද පැමිණිල්ලේ සදහන් වේ.
මීට අදාල සියලු තොරතුරු ඇතුළ පැමිණිල්ල කොළඹ විශ්ව විද්‍යාලයේ කළමනාකරණ සහ සංවිධාන අංශය වෙතත් එහි පැමිණිලි විශ්ව විද්‍යාල ප්‍රතිපාදන කොමිසම, උපකුලපති, පීඨාධිපති, ලේඛකාධිකාරි වෙතත් යොමු කර ඇත.
මේ පිළිබදව සාධාරණ හා අපක්ෂපාතී පරීක්ෂණයක් සිදු කොට අගතියට පත් වූ ශිෂ්‍ය පිරිසට සාධාරණයක් ඉටු කරන ලෙස එම ශිෂ්‍යයෝ වගකිවයුත්තන්ගෙන් ඉල්ලා සිටිති.
- ශිරාන් රණසිංහ