ගුවන් ගමන් වාර ප්‍රමාදයෙන් කෝටි 27ක පාඩුවක්
ගුවන් ගමන් වාර 548ක් ප්‍රමාද වීම නිසා 2023 වසරේ දී ශ්‍රී ලංකන් ගුවන් සමාගම රුපියල් කෝටි 27කට ආසන්න පාඩුවක් ලබා ඇති බව විගණන වාර්තාවකින් අනාවරණය වනවා.
2023 වසරේ දී වෙනත් ආයතනවලින් කල්බදු කුලී පදනම යටතේ ගුවන් යානා ලබාගැනීමට රුපියල් කෝටි 640ක් වැය කර ඇති බවද එහි සඳහන්.
මෙම පාඩුව ලබා ඇත්තේ 2022 අප්‍රේල් සිට 2023 සැප්තැම්බැර් 30 දක්වා කාලය තුළ ප්‍රමාදයන්ට ලක්වු ගුවන් ගමන් වාර හේතුවෙන්.
මෙම ගමන් වාර 548 තුළ පැය තුනේ සිට පැය 56 දක්වා එනම් දින දෙකකට අධික කාලයක් ප්‍රමාද වූ ගුවන් ගමන් ද පවතින බවයි විගණන වාර්තාවේ දැක්වෙන්නේ.
මෙම ප්‍රමාදයන් වෙනුවෙන් ප්‍රතිස්ථාපන ගුවන් යානා ද නියමිත වෙලාවට ලබාගැනීමට නොහැකි වීම, සේවා කළ නොහැකි NEO එන්ජින් ගොඩබිම පැවතීම, ගුවන් යානා අමතර කොටස් ලබාගැනීමට දිගු කාලයක් ගතවීම සහ සමාගමේ මුදල් තත්ත්වය අයහපත් වීම මෙම ප්‍රමාදය සඳහා බලපා තිබෙනවා.
එම විගණන වාර්තාවේ සඳහන් වන පරිදි ශ්‍රී ලංකන් ගුවන් සමාගම සතුව ගුවන් යානා 27ක් අවශ්‍ය වුවද වත්මන් ගුවන් යානා බලඇණියේ පවතින්නේ ගුවන් යානා 21ක් පමණයි.