හවස තේ වෙලාවට රසම රස පාන් Pizza එකක් හදමුද
මේ වැස්ස දවස්වල පොඩි පොඩි බඩගිනි එහෙම එනවා වැඩියි නේද.
නිතර නිතර එන ඒ පොඩි බඩගිනි නිවන්න අපි අරන් ආවා රසම රස කෙටි කෑමක් ගැන ඔත්තුවක්.
ඒ තමයි ‘පාන් Pizza’
රස විතරක් නෙවෙයි, විශේෂම කාරණය මේ පාන් Pizza හදාගන්න ඔබට යන්නේ සුළු වෙලාවක් සහ සීමිත අමුද්‍රව්‍ය කිහිපයක් වීම. ඒ විතරක් නෙවෙයි, වැඩෙත් ලේසියි.
අවශ්‍ය ද්‍රව්‍ය :
- පාන් පෙති කීපයක්
- තක්කාලි සෝස්
- කුඩාවට කපාගත් කුකුල් මස්
- කැරට්
- ගෝවා
- මොසරැල්ලා චීස්
- ලුණු ස්වල්පයක්
- ගම්මිරිස් ස්වල්පයක්
- සුදු ලූණු සහ අමු මිරිස්
සාදන ආකාරය :
- පළමුව එළවළු හොඳින් සෝදා කුඩාවට කපාගන්න.
- බටර් ස්වල්පයක් රත්වෙන්න තබා කුඩාවට කපාගත් කුකුළු මස් කැබලි හොඳින් බැදගන්න.
- ටික වේලාවකින් ඊට සුදු ලූණු, අමු මිරිස් සහ එළවළු ද එකතු කරගන්න.
- පසුව ලුණු සහ ගම්මිරිස් රස අනුව එකතු කර හොඳින් මිශ්‍ර කරගන්න.
- එය හොඳින් පිසුණු පසු ලිපෙන් ඉවතට ගෙන නිවෙන්නට හරින්න.
- අනතුරුව පාන් පෙතිවල එක් පැත්තක් යාන්තමට ටෝස්ට් කරගන්න.
- ඒවායෙහි මතුපිට සෝස් තවරාගන්න.
- ඒ මතට කලින් සාදාගත් මිශ්‍රණය තට්ටුවක් ආකාරයෙන් තබා ඊට උඩින් චීස් දමාගන්න.
- අවසානයේ මද උෂ්ණත්වය සහිත උඳුනක සාදා ගත් පාන් Pizza පෙති බේක් කරගන්න.