පොලිස් නිෂ්කාශන වාර්තා ලබා ගැනීම සම්බන්ධයෙන් මහජනතාවට පොලිසියෙන් විශේෂ නිවේදනයක්

දේශීය හා විදේශීය පුරවැසියන්ට  පොලිස් නිෂ්කාශන වාර්තා නිකුත් කිරීමේ ක්‍රමවේදය සම්බන්ධයෙන් පොලිස් මාධ්‍ය කොට්ඨාසය විසින් දැනුම්දීමක් කර තිබෙනවා.

විවිධ අවශ්‍යතා සඳහා දේශීය හා විදේශීය පුරවැසියන් පොලිස් නිෂ්කාශන වාර්තා ලබා ගැනීම හා ඊට අදාළවන ක්‍රමවේදය සම්බන්ධයෙන් ශ්‍රී ලංකා පොලීසියෙන් නිරන්තරයෙන් විමසීම් සිදුකරන බව අදාළ නිවේදනයේ සඳහන් වෙනවා.  ඒ අනුව අන්තර්ජාලය ඔස්සේ ශ්‍රී ලංකා පොලිස් වෙබ් අඩවියට පිවිස www.police.lk හරහා E-service යොමුවට පිවිස Clearance Certificates යන්න තෝරාගෙන අදාළ අයදුම්පත සම්පූර්ණ කර නිෂ්කාශන වාර්තා ලබා ගැනීම සඳහා ඉල්ලුම් කිරීමට ඉඩ සලසා දී ඇති බවයි පොලිසිය සඳහන් කරන්නේ.

ශ්‍රී ලංකා පොලිසිය විසින් විදේශගතව සිටින පුරවැසියෙකු පොලිස් නිශ්කාශන වාර්තාවක් ලබා ගැනීම සඳහා සඳහා රුපියල් 5,100ක මුදලක් ගෙවිය යුතු වන අතර, ඊට අදාල මුදල් ලදුපත ලැබීමෙන් පසු දින 14ක් වැනි කාලයකදී තම පොලිස් නිෂ්කාශන වාර්තාව ලබා ගැනීමේ හැකියාව ඇති බව අදාළ නිවේදනයේ දැක්වෙනවා.