කෙහෙල්බද්දර පද්මේ, කොමාණ්ඩෝ සලින්ත, පානදුරේ නිලංග, බැකෝ සමන්, ඔහුගේ බිරිය, දරුවා සහ තැඹිලි ලහිරු නමැති පාතාල කෙරුමන් අනිද්දා (31දා) ශ්‍රී ලංකාවට
(සමන් ගමගේ)
ඉන්දුනීසියාවේදී අත්අඩංගුවට ගනු ලැබූ මන්දීනු පද්මසිරි හෙවත් කෙහෙල්බද්දර පද්මේ, කොමාණ්ඩෝ සලින්ත, පානදුරේ නිලංග, බැකෝ සමන්, ඔහුගේ බිරිය, දරුවා සහ තැඹිලි ලහිරු නමැති පාතාල කෙරුමන් අනිද්දා (31දා) ශ්‍රී ලංකාවට රැගෙන ඒමට නියමිත බව පොලිස් මාධ්‍ය ප්‍රකාශක සහකාර පොලිස් අධිකාරි එෆ්.යූ. වුට්ලර් මහතා පැවසීය.
ඉතිහාසයේ ප්‍රථම වතාවට ශ්‍රී ලංකා පොලිසියේ අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් ඉන්දුනීසියාව වෙත ගොස් එරට පොලිසිය සහ ජාත්‍යන්තර පොලිසිය සමඟ ඒකාබද්ධව පෙරේදා (27දා) සිදු කළ මෙහෙයුමකදී මෙම පාතාල ප්‍රබලයන් පිරිස කොටුකරගනු ලැබූහ.
කෙහෙල්බද්දර පද්මේ සහ කොමාන්ඩෝ සලින්ද ඇතුළු පාතාලයන් පිරිසක් මැලේසියාවේදී අත්අඩංගුවට පත්වූ බව මීට පෙර වාර්තා විය. එහිදී ඔවුන් මෙරටට රැගෙන ඒම සඳහා අපරාධ පරීක්ෂණ දෙපාර්තමේන්තුවේ නිලධාරීන් පිරිසක් මැලේසියාව බලා පිටත්ව ගියද ඒ වන විට කෙහෙල්බද්දර පද්මේ ඇතුළු පිරිස මැලේසියාවෙන් පිටව ගොස් තිබිණි.
මැලේසියානු පොලිසියට සහ ජාත්‍යන්තර පොලිසියට ඔවුන්ව නිශ්චිතව හඳුනාගත නොහැකි වීම එම තත්ත්වයට හේතු විය. කෙසේ වෙතත් මෙම සිද්ධියෙන් පසු ශ්‍රී ලංකා පොලිසිය කළ දැනුම්දීම් අනුව ඔවුන් පිළිබඳව අවධානයෙන් පසුවූ ජාත්‍යන්තර පොලිසිය ඉකුත් දිනක මෙම පිරිස ඉන්දුනීසියාවේ රැඳී සිටින බවට ශ්‍රී ලංකා පොලිසියට දැනුම් දෙනු ලැබීය.
එම දැනුම්දීම අනුව ඉන්දුනීසියාවේ ශ්‍රී ලංකා තානාපතිනිය මගින් එරට ඉහළ බලධාරීන් දැනුවත් කිරීමෙන් පසුව සිදු කළ සැලසුමකට අනුව අපරාධ පරීක්ෂණ දෙපාර්තමේන්තුවේ නිලධාරීන් කණඩායම එහි ගොස් මෙම ඒකාබද්ධ මෙහෙයුම සිදු කළ බව පොලිස්පති ප්‍රියන්ත වීරසූරිය මහතා රජයේ ප්‍රවෘත්ති දෙපාර්තමේන්තුවේදී පැවසීය.
අත්අඩංගුවට ගත් මෙම පාතාල ප්‍රබලයන් පිරිසට එරෙහිව මිනිස් ඝාතන, මත්ද්‍රව්‍ය ජාවාරම් කිරීම සහ කප්පම් ගැනීම ආදී චෝදනා රැසක් පවතින් බවද පොලිස්පතිවරයා පෙන්වා දුන්නේය. අත්අඩංගුවේ පසුවන අපරාධකරුවන් පස් දෙනාම රතු වරෙන්තු නිකුත් වූවන් බවද පොලිස්පතිවරයා කීය.
මෙරට අධිකරණයක් තුළ සිදුවූ දෙවැනි මිනිස් ඝාතනය ලෙසින් ඉතිහාසයට එක්වූ ගණේමුල්ලේ සංජීව නමැත්තා ඉකුත් වසරේදී කොළඹ අලුත්කඩේ මහෙස්ත්‍රාත් අධිකරණය තුළදී වෙඩි තබා ඝාතනය කිරීමේ සිද්ධියේ මහ මොළකරුවන් ලෙසින් පොලිසිය හඳුනාගෙන සිටියේ කෙහෙල්බද්දර පද්මේ සහ කොමාන්ඩෝ සලින්ත යන පාතාලයන් දෙදෙනාය.
එම සිද්ධයෙන් පසු ගම්පහ පාතාලයේ රජු බවට පත්වූ කෙහෙල්බද්දර පද්මේ පත්වූ අතර ඔහුගේ න්‍යායාචාර්යවරයා ලෙස ක්‍රියාත්මක වූ ගම්පහ පස් දේවා සහ වලස් කටා පසුගියදා බස්නාහිර උතුර අපරාධ කොට්ඨාසය මගින් අත්අඩංගුවට ගත් අවස්ථාවේ එහි ස්ථානාධිපති ලින්ටන් ද සිල්වා මහතාට දුරකථනයේ බැණ මරණීය තර්ජන එල්ල කිරීමේ සිද්ධියටද පද්මේ සහ කොමාන්ඩෝ සලින්ත සම්බන්ධ බව පොලිසිය සඳහන් කළේය.
මෙම මෙහෙයුමේදී අත්අඩංගුවට ගත් බැකෝ සමන් හා තැඹිලි ළහිරු යනු මිද්දෙණියේ අනුර විදානගමගේ හෙවත් කජ්ජා සහ ඔහුගේ දරු දෙදෙනා යතුරුපැදියක ගමන් කරමින් සිටියදී මිද්දෙණිය ගල්පොල්ලයාය හන්දියේදී ටී-56 ගිනි අවියකින් වෙඩි තබා අමානුෂික ලෙසින් ඝාතනය කළ සිද්ධියේ සැලසුම්කරුවන් බව එම ත්‍රිත්ව ඝාතනයෙන් පසු පොලිසිය සිදු කළ විමර්ශනවලදී හඳුනාගනු ලැබීය.
අත්අඩංගුවට ගෙන සිටින පානුදුරේ නිලංග යනු කුඩු ජාවාරම හේතුවෙන් පානදුරේ සළිඳු සමඟ මාරාන්තික සටනක් අරඹා ඝාතන සැලසුම් ගණනාවක් ක්‍රියාත්මක කළ සැකකරුවෙක් බවද පොලිසිය සඳහන් කරයි. අත්අඩංගුවට ගත් සියලුම පාතාලයන් ප්‍රබල මත්ද්‍රව්‍ය ජාවාරම්කරුවන් ලෙසින් ද පොලිසිය හඳුනාගෙන ඇත.
මොවුන්සමඟ ඉන්දුනිසියාවේදී අත්අඩංගුවට ගත් කාන්තාව බැකෝ සමන්ගේ බිරිය වන අතර දරුවා ඔවුන් දෙදෙනාගේ දරුවා බවද පොලිසිය පවසයි.
මොවුන් ශ්‍රී ලංකාවට රැගෙන ඒමෙන් පසු වැඩිදුර විමර්ශන සිදු කිරීමට නියමිතය.