ඊශ්‍රායල් රැකියා පෙන්වා රුපියල් කෝටියකට අධික වංචාවක් කළ කාර්යාංශ රියැදුරෙක් අත්අඩංගුවට
(ශිරාන් රණසිංහ)
ශ්‍රී ලංකා විදේශ සේවා නියුක්ති කාර්යාංශයේ සේවය කරමින් සිට සේවයෙන් ඉවත් කර ඇති රියැදුරු විසින් ඊශ්‍රායලයේ රැකියා ලබා දෙන බව පවසා සිදුකල මහා පරිමාණ වංචාවක් සම්බන්ධයෙන් කාර්යාංශයේ විශේෂ විමර්ශන අංශය වෙත පැමිණිලි රැසක් ලැබී තිබූ අතර ඒ සම්බන්ධයෙන් කාර්යාංශයේ පොලිස් ඒකකයේ නිලධාරීන් විසින් විමර්ශනයක් මෙහෙවා තිබේ.
කාර්යාංශයේ සභාපති කෝසල වික්‍රමසිංහ මහතා විසින් වහාම මේ සම්බන්ධව කටයුතු කරන ලෙස පොලිස් ඒකකකය වෙත උපදෙස් ලබා දී තිබූ අතර, ඒ අනුව අදාළ මුදල් බැර කළ බැංකු ගිණුම් හිමි කාන්තාව කාර්යාංශයේ විමර්ශන අංශයේ පොලිස් ඒකකයේ නිලධාරීන් විසින් 25දා අවිස්සාවේල්ල ප්‍රදේශයේදී අත්අඩංගුවට ගන්නා ලදී. එහිදී සිදු කළ ප්‍රශ්න කිරීම්වලදී එම කාන්තාව අදාළ රියැදුරු සමග සමීප සම්බන්ධතාවයක් පවත්වාගෙන ගොස් ඇති බවට කරුණු අනාවරණය විය. අදාළ රියැදුරු මේ වන විට විමර්ශන නිලධාරීන් මඟ හරිමින් සැගවී සිටින අතර ඔහු අත්අඩංගුවට ගැනීමට මේ වන විටත් පුළුල් විමර්ශන මෙහෙයවයි.
සැකකාර රියැදුරට එරෙහිව මේ වන විට කාර්යාංශයට පැමිණිලි අටක් ලැබී ඇති අතර රුපියල් කෝටියකට ආසන්න මුදලක් වංචාකර ඇති බවට තොරතුරු අණාවරණය වී ඇත. එම පැමිණිලිවලට අනුව ඔහු දිවයිනේ විවිධ ප්‍රදේශවල පදිංචි පුද්ගලයන්ගෙන් ඊශ්‍රායල් රැකියා ලබා දෙන බව පවසා මුදල් රැස්කර තිබේ. එහිදී එම රියැදුරා විසින් වංචාකර ලබාගත් මුදල්, අත්අඩංගුවට ගත් කාන්තාවගේ ගිණුමට බැර කර තිබේ. මේ සිද්ධියට අදාළව වංචාවන්ට හසුවූ පුද්ගලයන් සිටිනම් වහාම කාර්යාංශයට දන්වන ලෙස ඉල්ලා සිටින අතර 1989 දුරකථනයට ඒ බව් දැනුම් දිය හැකිය.
මෙම වංචාව සම්බන්ධයෙන් අත්අඩංගුවට ගත් සැකකාරිය අද දින අවිස්සාවේල්ල වැඩ බලන මහේස්ත්‍රාත්වරයා වෙත ඉදිරිපත් කිරීමෙන් අනතුරුව 27 දක්වා රක්ෂිත බන්ධනාගාරගත කිරීමට වැඩබලන මහෙස්ත්‍රාත්වරයා නියෝග කරන ලදී.
කාර්යාංශයේ නම භාවිතා කරමින් සිදුකරණ විදේශ රැකියා වංචාවන් නීතියේ රැහනට හසුකර ගැනිම සදහා පුලුරෑල් විමර්ශන ක්‍රියාත්මක කරන අතර, විදේශ රැකියා වංචාවන්ට හසුවන පුද්ගලයින්ට තරාතිරම නොබලා දැඩිදඩුවම් ලබා දිමට අධිකරණ ක්‍රියාමාර්ග ගන්නා බවද කාර්යාංශයේ සභාපති කෝශල වික්‍රමසිංහ මහතා සදහන් කරයි. කාර්යාංශයේ පිහිටවන ලද නව පොලිස් ඒකකය මගින් මේවන විට විදේශ රැකියා වංචාවන් රැසක් හෙලිකරගෙන ඇති අතර ඉදිරියේදි ඔවුන් නීතියේ රැහැනට කොටුකර ගැනිමට කටයුතු යොදා ඇති බවද ඔහු කියයි.