‌නාවික හමුදාවට යෝගා අභ්‍යාස: නාවිකයින් 26 දෙනෙකුට සහතිකපත්

කලාකීර්තී යෝගා ආචාර්ය අනෝජා වීරසිංහ මහත්මිය විසින් මෙහෙයවන ලද, යෝගා පුහුණු උපදේශකයින් පුහුණු කිරීමේ වැඩසටහනෙහි සමාප්ති උළෙල ඊයේ වැලිසර, ශ්‍රී ලංකා නාවික නෞකා ගැමුණු ආයතනයේ කොමාණ්ඩර් පරාක්‍රම සමරවීර ගෘහස්ථ ක්‍රීඩාගාරයේදී පැවැත්වුණා.

ඒ, නාවික හමුදා මාණ්ඩලික ප්‍රධානී රියර් අද්මිරාල් ජයන්ත කුලරත්න මහතාගේ ප්‍රධානත්වයෙන්.

නාවික හමුදාව තුළ යෝගා අභ්‍යාස ප්‍රචලිත කිරීමේ අරමුණින්, ශාරීරික අභ්‍යාස උපදේශක නාවිකයන් වෙනුවෙන් මෙම වැඩසටහන ආරම්භ කෙරුණා.

පසුගිය අගෝස්තු මස 07 වැනි දින ආරම්භ කෙරුණු මෙම යෝගා පුහුණු උපදේශක වැඩසටහන සඳහා නාවික හමුදා ශාරීරික අභ්‍යාස උප‍දේශක නාවිකයන් 26 දෙනෙකු සහභාගී වුණා.

පුහුණු වැඩසටහන සාර්ථකව නිම කළ ශාරීරික අභ්‍යාස උපදේශක නාවිකයන් වෙනුවෙන් සහතික පත් ප්‍රදානය කිරීම සිදුකෙරුණේ, නාවික හමුදා මාණ්ඩලික ප්‍රධානී රියර් අද්මිරාල් ජයන්ත කුලරත්න මහතා විසින්.