රාජ්‍ය සේවය කාර්යක්ෂම හා මිත්‍රශීලී කරන්න අනු කමිටුවක්: කරුණු හතරක් ඔස්සේ ජනතාවට සමීප වීම අරමුණයි
ශ්‍රී ලංකාවේ රාජ්‍ය සේවය කාර්යක්ෂම සහ මිත්‍රශීලී සේවයක් බවට පත් කිරීම සඳහා මාර්ගෝපදේශ යෝජනාවලියක් සකස් කිරීම සඳහා විවෘත සහ වගකිවයුතු රජයක් පිලිබඳ ආංශික අධීක්ෂණ කාරක සභාව අනු කමිටුවක් පත් කොට තිබෙනවා.
මෙම පාර්ලිමේන්තු අනු කමිටුව නීතිඥ උදයන කිරිඳිගොඩ මහතාගේ සභාපතීත්වය යටතේ ජනාධිපති නීතිඥ ජයන්ත වීරසිංහ, ජේ. සී. අලවතුවල, මොහොමඩ් මුසාමිල්, චමින්ද විජේසිරි, සංජීව එදිරිමාන්න සහ ගුණතිලක රාජපක්ෂ යන පාර්ලිමේන්තු මන්ත්‍රීවරුන් සහ විද්වත් සාමාජිකයන් 14 දෙනෙක් ගෙන් සමන්විතයි.
කොළඹ විශ්ව විද්‍යාලයේ උපකුලපති ජේෂ්ඨ මහාචාර්ය එච්.ඩී. කරුණාරත්න, කොළඹ විශ්ව විද්‍යාලයේ ආර්ථික විද්‍ය අධ්‍යනාංශයේ මහාචාර්ය ප්‍රියංග දුණුසිංහ, ශ්‍රී ජයවර්ධනපුර විශ්ව විද්‍යාලයේ ව්‍යාපාර ආර්ථික විද්‍යා අධ්‍යනාංශ ප්‍රධානී ආචාර්ය ජානක ප්‍රනාන්දු, කැපිටල් මහරාජා සමූහයේ අධ්‍යක්ෂ අශෝක ඩයස්, පැෆරල් සංවිධානයේ සභාපති රෝහණ හෙට්ටිආරච්චි, සර්වෝදය ශමදාන ව්‍යාපාරයේ සභාපති වෛද්‍ය වින්‍යා ආරියරත්න, විශ්ව විද්‍යාල ප්‍රතිපාදන කොමිෂන් සභාවේ සභාපති ජේෂ්ඨ මහාචාර්ය සම්පත් අමරතුංග, මැතිවරණ කොමසාරිස් ජනරාල් සමන් ශ්‍රී රත්නායක, ප්‍රජාතන්ත්‍රීය ප්‍රතිසංස්කරණ සහ මැතිවරණ අධ්‍යයන ආයතනයේ (IRES) විධායක අධ්‍යක්ෂ මංජුල ගජනායක, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ ලේකම් වසන්තා පෙරේරා, රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍යාංශයේ ලේකම් කේ.ඩී.එන් රංජිත් අශෝක, මහජන ආරක්ෂක අමාත්‍යාංශයේ ලේකම් වියානි ගුණතිලක, ජනමාධ්‍ය අමාත්‍යාංශයේ ලේකම් අනුෂ පැල්පිට, සහ ආංශික අධීක්ෂණ කාරකසභා සභාපතිවරයාගේ උපදේශක ආචාර්ය කේ.ඒ. තිලකරත්න යන මහත්ම මහත්මීහු මෙම විද්වත් කමිටුවේ සෙසු සාමාජිකයන්.
උක්ත අනුකමිටුව පසුගිය දා පාර්ලිමේන්තුවේදී රැස්වූ අවස්ථාවේ මේ පිළිබඳ දීර්ඝ වශයෙන් සාකච්ඡා කෙරුණු අතර විද්වත් අදහස් ලබා ගැනිම සඳහා පත් කරන ලද විද්වත් කමිටුව කාරක සභාව වෙත කැඳවා තිබුණා.
එහි දී ශ්‍රී ලංකාවේ රාජ්‍ය සේවය කාර්යක්ෂම සහ මිත්‍රශීලී සේවයක් බවට පත් කිරීම සඳහා මාර්ගෝපදේශ යෝජනාවලියක් සකස් කිරීම පිළිබඳ මූලික අදහස් හා යෝජනා ඉදිරිපත් කෙරුණා.
පසුගිය කාලය තුළ විවෘත සහ වගකිවයුතු රජයක් පිලිබඳ ආංශික අධීක්ෂණ කාරක සභාව වෙත කැඳවන ලද විවිධ රාජ්‍ය ආයතන සහ රාජ්‍ය නොවන සංවිධාන විසින් මෙරට රාජ්‍ය සේවය කාර්යක්ෂම සහ මිත්‍රශීලී සේවයක් බවට පත් කිරීම සඳහා වන යෝජනා අනු කමිටු සභාපතිවරයා විසින් විද්වත් කමිටුව වෙත ඉදිරිපත් කරන තිබෙනවා.
එම යෝජනා ද සැලකිල්ලට ගෙන අදාළ යෝජනාවලිය මේ වසර තුළදී සකස් කොට අවසන් කිරීමටයි මෙහි දී විද්වත් කමිටුව එකඟතාවය පළ කර ඇත්තේ.
මෙරට රාජය සේවය පිළිබඳ මහජනතාව තුළ පවතින ආකල්ප පිළිබඳ එම කමිටුවේ අවධානය යොමු වූ අතර අකාර්යක්ෂමතාවය, නිසි වගකීමක් නොමැති වීම, දුෂණ වංචා, ඇගයීමේ නිසි ක්‍රියාවලියක් නොමැති වීම, මනා සම්බන්ධීකරණයක් නොමැතිවීම මෙන් ම දේශපාලන මැදිහත්වීම් කෙරෙහි ද මෙහිදි අවධානය යොමු ව තිබුණා.
ඒ අනුව විවෘතභාවය, වගකීම, කාර්යක්ෂමතාවය සහ මිත්‍රශීලීභාවය යන කරුණු 04 ඔස්සේ මෙරට රාජ්‍ය සේවය වඩාත් මහජනතාවට සමීප කිරීම සඳහා මාර්ගෝපදේශ යෝජනාවලිය සකස් කිරීමට කමිටුව එකඟ වූ අතර අදාළ යෝජනා ක්‍රියාත්මක වීම නියාමනය කිරීමේ අවශ්‍යතාවය ද කමිටුව විසින් පෙන්වා දී තිබෙනවා.