කඳු නැගීමට ගොස් අතුරුදන් වූ ජනප්‍රිය නළු ජූලියන්ගේ සිරුරු කොටස් හමුවෙයි ?: ''ජූලියන් අපූරු පියෙකු, ස්වාමිපුරුෂයෙකු, ගවේෂකයෙකු, ස්වාභාවික ලෝකයට සහ කලාවට ආදරය කරන්නෙකු ලෙස සහ රංගන ශිල්පියෙකු ලෙස ඔහු පිළිබඳ දීප්තිමත් මතකයන් සමඟ අපි ඔහුව අපගේ හදවත් තුළ තබාගෙන සිටිමු."

Colombo (Monara) June 26 - මාස 5කට ඉහත දී අතුරුදන් වූ ජනප්‍රිය නළු ජූලියන් සෑන්ඩ්ස් (Julian Sands) මියගොස් ඇති බවට අනුමාන කරන බව විදෙස් මාධ්‍ය වාර්තා කරනවා.

ඒ ඔහු අතුරුදන් වූ ප්‍රදේශයෙන් ජූනි 24 සෙනසුරාදා කැලිෆෝනියාවේ කඳු නගින්නන් විසින් මිනිස් අවශේෂ සොයා ගැනීමත් සමඟ.

කෙසේ නමුත් විදෙස් මාධ්‍ය සඳහන් කරන්නේ දේහය තවමත් බලධාරීන් විසින් හඳුනාගෙන නොමැති බවයි.

ඒ අනුව හමු වූ ශරීර කොටස් තහවුරු කරගැනීම සඳහා හදිසි මරණ පරීක්ෂක කාර්යාලය වෙත යවා ඇති බවයි සඳහන් වන්නේ.

ලොස් ඇන්ජලීස් සිට සැතපුම් 45 ක් පමණ නැගෙනහිරින් වූ සැන් ගේබ්‍රියෙල් කඳුකරයේ බල්ඩි කන්ද (San Gabriel Mountains in Mt. Baldy) නැගීමේ චාරිකාවකට ගොස් ආපසු පැමිණීමට නොහැකි වූ ජූලියන්, ජනවාරි 13 වන දින අතුරුදන් වූ බව‍යි වාර්තා වූයේ.

ඔහු සෙවීම තාවකාලිකව අත්හිටුවන ලද අතර, පසුව ජුනි 17 වන දින නැවත එම කටයුතු ආරම්භව තිබෙනවා.

ඒ අනුව ජූලියන් සොයා පොලිසිය විසින් ගොඩබිම් සහ ගුවනින් සෝදිසි කිරීම් සිදුකළ බවයි වාර්තා වන්නේ.

බල්ඩි කන්ද කැලිෆෝනියාවේ කඳු නැගීම සඳහා වඩාත් භයානක කඳු මුදුනක් ලෙස ප්‍රසිද්ධ ය.

ජූලියන්ගේ අතුරුදන් වීමෙන් පසු ඔහුගේ පවුලේ අය පසුගිය සතියේ පළමු වරට නිවේදනයක් නිකුත් කර තිබුණු අතර

"ජූලියන් සොයාගැනීමට වෙහෙස නොබලා කටයුතු කළ ගවේෂණ කණ්ඩායම් සහ සම්බන්ධීකාරකවරුන්ට අපි බෙහෙවින් කෘතඥ වෙනවා... ජූලියන් අපූරු පියෙකු, ස්වාමිපුරුෂයෙකු, ගවේෂකයෙකු, ස්වාභාවික ලෝකයට සහ කලාවට ආදරය කරන්නෙකු ලෙස සහ රංගන ශිල්පියෙකු ලෙස ඔහු පිළිබඳ දීප්තිමත් මතකයන් සමඟ අපි ඔහුව අපගේ හදවත් තුළ තබාගෙන සිටිමු." යන්නෙන් එහි සඳහන්ව තිබෙනවා.

රංගන ශිල්පියෙක්ට අමතරව ජූලියන් ප්‍රවීණ කඳු නගින්නෙක් ද වෙනවා.

ඔහු ‘A Room with a view,’ ‘Warlock,’ සහ ‘Leaving Las Vegas’ ඇතුළු චිත්‍රපට කිහිපයකටම ඔහු සිය දායකත්වය ලබා දී තිබෙනවා.